اسلام آباد۔ 09جولائی (اے پی پی) قومی اسمبلی ءِ پاننگانے کہ ملک انا شاری و خلقی علاقہ غاتے ٹی پوسکن آ پاکستان ہاؤسنگ اسکیم نا رداٹ اُراتاتفنگ ترندی اٹ مون آ ہِننگ ءِ، خلقی علاقہ غاتا 12تحصیل آتے ٹی ہم پروگرام نا بناءِ کننگانے، پرائیویٹ پبلک پارٹنر شپ انا رداٹ مچ آ ملک اٹی 4آن 6تُواٹی 30لکھ اُراتا تفنگ نا بناءِ کننگک و حکومت نا کنڈآن داڑآ 3لکھ روپئی اسکان سبسڈی ہم تننگک۔ جمعہ نادے آ قومی اسمبلی ٹی نواب شیر وسیر نا وزیراعظم نا پوسکن آ پاکستان ہاؤسنگ ڈٹ انا رداٹ غریب خاہوت آتے کن چنکا ہاؤسنگ یونٹ تفنگ نا رداٹ ڈٹ بندی نا کمتی نا بابت چکاری نوٹس نا ورندی ٹی وزیراعظم نا سلاہکار پارلیمانی امور ڈاکٹر بابر اعوان پارے کہ حکومت پوسکن آ پاکستان ہاؤسنگ نا بابت تینا کاریم ءِ کننگ ءِ، مخلوق ءِ اوفتا تُوئی کِرانا بریبر 20سال اسکان ماہانہ قسط ادا کروئی تمک۔ اوپارے کہ دارداٹ ورکرز ویلفیئر فنڈ ز، حبیب بینک و عسکری بینک آتون اوار ہرچار آ صوبہ غاتون ایم او یو آ دستخط مسنے۔ دااُراپوسکن آ پاکستان اسکیم نا رجسٹرڈ مخلوق ءِ ملک۔ اوپارے کہ میوزئی نوشہرہ، علی پور فراش اسلام آباد و لاہور اٹی مسہ نیم مرلہ غان پنچ مرلہ ڈغار آ 45ہزار اُراتا تفنگ نا بناءِ کننگانے۔ داہژدہ تُواٹی پورو مریک۔ دانا قسط 6ہزار ماہانہ غان 10ہزار ماہانہ اسکان مریک۔ کِراتروک آمخلوق کِراتننگ نا جاگہ غا 20سال اٹی اُرانا خواجہ مریرہ۔ اوپارے کہ وزیراعظم چندی خلقی علاقہ غاتا 12تحصیل آتے ٹی ہم داپروگرام نا بناءِ کرینے۔ ہرامخلوق تینٹ اُراتفنگ کن بینک آتیان وام ہلنگ خوارہ اوفتے کن 110ارب وام اکن جتا زرآن 35ارب روپئی نا وام منظور مسنے۔ چکار ی نوٹس آ ملک نواب شیر و سیر نا سوج انا ورندی ٹی سلاہکار پارلیمانی امور ڈاکٹر بابر اعوان پارے کہ اولیکو وار خلق آتا 12تحصیل آتے ٹی ہاؤسنگ پروجیکٹ آتا بناءِ کننگانے۔ پبلک پرائیویٹ پارٹنر شپ انا رداٹ ہاؤسنگ ڈٹ آتے خلق آتسکان سرکننگک۔ داڈٹ آتا رداٹ 30لکھ اُراتفنگک و حکومت نا کنڈآن مسہ لکھ روپئی اسکان سبسڈی تننگک و دااُرا چارآن شش تُواٹی جوڑ مننگ بناکیک۔
