اسلام آباد۔ 09جولائی (اے پی پی) وزیراعظم نا خصوصی کمکار امور نوجوانان عثمان ڈار پارینے کہ 5لکھ ورناتے اسکلز اسکالر شپ تننگک، سرسہب ورنا پروگرام میرٹ و شفافیت آ مبنی ءِ، ننے ورناتے برسرروزگار کننگ تون اوار اوار تینا نت تیا سلفنگ نا ءِ۔ داخیال آتا درشانی ءِ او جمعہ نادے آ نیشنل یوتھ کونسل نا دود آن تران کرسا کرے۔ اوپارے کہ ورناتے چندی چیلنج مون تروک ءِ،۔ ہرسال 20لکھ ورناجاب مارکیٹ اٹ بریرہ۔ اوفتے کن روزگار ودی کننگ بھلو چیلنج اسے۔ اوپارے کہ حکومت نجی بشخ ءِ آسراتی ترسا و کاروباراٹی آسانی ودی کرسا ملازمت آتا وارخواہی ودی کننگ ءِ۔ اوپارے کہ سرسہب ورناپروگرام نا رداٹ ورناتے آسان شڑت آتیا 5لکھ آن دونیم کروڑ روپئی اسکان نا وام تننگا۔ داورناتا خاص ءُ آئیڈیہ ئسر ولے او مالی مشکل آتا سوب آن تینا کاروبار ءِ کننگ کتورہ۔ اوپارے کہ وزیراعظم عمران خان ورناتیا پت کرینے۔ مستین اٹ ورناتے گوجالنگا۔ اوپارے کہ ورناتے کن وام تا دنگ ءِ ودفسا 20لکھ روپئی آن 5کروڑ روپئی کننگ انگ ءِ۔ اوپاریے کہ ہائی ٹیک تون اوار چندی بشخ آتے ٹی اسہ لکھ 70ہزار ورناتے اسکلز اسکالرشپ تسونن۔ دانا سرسہبی ءِ ہرسا وزیراعظم پارت کرینے کہ دا اسکالرشپ ءِ 5لکھ ورناتسکان ودفنگے۔ بیرہ ہائی ٹیک نا بشخ اٹی 50ہزار ورناتے اسکالرشپ تننگانے۔ اوپارے کہ مسلم لیگ (ن) تینا دور حکومت اٹ اسہ لکھ لیپ ٹاپ بشخا و اوڑآ 50ارب روپئی خڑچ کرے ولے ساڑی حکومت ورناتے برسر روزگار کننگ و واکدار کننگ کن مصنوعی ذہانت، سائبر سیکورٹی تون اوار ایلو بشخ آتے ٹی تربیت تسنے ہراڑآن اوفتے کن ملازمت آتا وارخواہی ودی مسنے۔ مستین اٹ قوم انا پیسہ غاتے جند انا زی آ خڑچ کننگا۔ ساڑی حکومت سجفسا قوم انا پیسہ غاتے خڑچ کننگ ءِ۔ کفایت شعاری آ عمل کننگ ءِ۔ وزیراعظم عمران خان پیشن نا ملک دورہ غاتیا کم آن کم پیسہ خڑچ کرینے۔ اوپارے کہ ورناتے فیصلہ سازی ٹی شریک کننگ انگ ءِ۔ نیشنل یوتھ کونسل نا چندی ورکنگ پڑک ٹہیفنگانے ہرا چندی بشخ آتا بابت کاریم کیک۔ داباسک آک ورناتا نمائندہ غاک ءُ و اوفتا ویل آتے تالان کیرہ۔ اوپارے کہ ورناتا ویل آتا رداٹ کانودسازی آ کاریم کننگ اُن۔ ورناتے کن ہرممکن آسانی ودی کننگ اُن تانکہ او ملکی شونداری ٹی اہم ءُ کڑد اس ادا کننگ کیر۔ سرسہب ورنا پروگرام شفافیت آ مبنی ءِ۔ دود آن وزیر مملکت حوالکاری و شینکاری فرخ حبیب ہم تران کرے۔ اوکان پد خصوصی کمکار امور نوجوانان بشخ ہلوک آتا سوج آتا ورندی ءِ ہم تس۔
