راولپنڈی۔ 09جولائی (اے پی پی) بنجائی وزیر ریلوائی اعظم خان سواتی پارینے کہ محکمہ ریلوائی ٹی مافیا تے چٹفسا مزور آتا تنخواہ تیٹی ودکی کننگک، ریلوائی نا ڈغار تیا کوزہ ءِ چٹفسا پبلک پرائیویٹ پارٹنر شپ انا رداٹ لیز آ تننگک، ریلوائی نسخان آن پیش تمسا کٹیائی ءُ ادارہ اس جوڑمرسا مون آ بریک۔ ریلوائی ٹی وڈی خوری کروک آ آفیسر آک ہچ ءُ رعایت اسے نا حقدار افس، وزیراعظم عمران خان ازبکستان نا دورہ ءِ کننگ والا ءِ و ایم ایل ون آن پد ارٹ میکو فیز بناکیک۔ داخیال آتا درشانی ءِ بنجائی وزیر جمعہ نادے آ راولپنڈی ریلوائی اسٹیشن اٹی سرسید ایکسپریس نجی بشخ انا حوالگی نا بنائی دود آن تران کرسا کرے۔ اعظم خان سواتی پارے کہ محکمہ ریلوائی نا ملازم آتا تنخواہ تیٹی ودکی کینہ وخت اس کہ مافیاک 65ہزار مخلوق ءِ ژند کرینو۔ مافیا ہردفتر نا تہہ ٹی ارے، 5آن 10درسد کمیشن ہلکرہ، ریلوائی نا مخلوق نا شرف اٹ ودکی کننگ نا ءِ تو مافیاتے کشوئی مریک و تدوک آ 6تُوآن ای کوشست اٹ لگوک اُٹ و داتسکان کہ مافیاتا دوٹی پارکنگ نا مچ آ نظام ہم ارے۔ اوپارے کہ 20آن 25دے اٹی غٹ مخلوق نا شناخت مریک ہرااُراتے ٹی تولوک تنخواہ ہلیرہ و اسہ لکھ 32ہزار بندغ پنشنرءُ۔ اوپارے کہ ریلوائی ہچ ءُ ڈغاراس کنا ساڑی گری ٹی بہاکننگتنے۔ ریلوائی نا ڈغار ءِ پبلک پرائیویٹ پارٹنر شپ انا رداٹ تننگک۔ اوپارے کہ چیف جسٹس آف پاکستان ریلوائی نا ڈغار ءِ مافیا تیان واگزار کرفنگ اٹ اہم کڑد ادا کرینے۔ ریلوائی ٹی پاکستان نا الس و پاکستان حکومت نا فائدہ ءِ، الس ءِ گچین آسراتی ایتنہ، ریلوائی نسخان آن پیش تمسا کٹیائی ءُ ادارہ اس جوڑ مرسا مون آ بریک و اسہ ٹرین اسے ہم ریلوائی آفیسر آتے چلیفنگ کن تفرہ غٹ ءِ پرائیویٹ کیوہ انتئے کہ پیسنجر ٹرین ءِ چلیفنگ پرائیویٹ مخلوق نا کاریم ءِ پاکستان ریلوائی نا آفیسر آتا داکچ اف کہ جوان ءُ سروس اس تننگ کیر۔
