اسلام آباد۔ 09جولائی (اے پی پی) بنجائی وزیر شاری ہوابازی غلام سرور خان پارینے کہ پیشن نا ملک رہینگوک آ پاکستانیک ملک انا نہادی میرات ءُ، کورونا دین انا حالیت آتا رداٹ وطن آ پدی بننگ اٹ اوفتا مشکل آتا ازالہ کن حکومت گچین بست وبند کننگ ءِ، وزیراعظم پاکستان نا پارت آ فلائٹ آپریشن ءِ 60آن 70درسد اسکان ودفنگ خوانہ تانکہ پیشن نا ملک رہینگوک آ پاکستانیک تینا سیال و قریب آتون عئید ءِ کننگ کیر۔ جمعہ نادے آ قومی اسمبلی ٹی چندی چندی ملک آتے ٹی اختہ پاکستانی تا بابت ایوان اٹ چست کروک آ اعتراضی ٹک انا ورندی ٹی بنجائی وزیر غلام سرور خان پارے کہ سمندر آن ایپار پاکستانیک ننا غٹ آن بھلا میرات ءُ و او ملک انا زرگزران اٹی تمبہ نا حیثیت تخرہ۔ اوفتا کل کچ 7.5ملین ءِ۔ ننا برآمد آک 24ارب ڈالر آن زیات ءُ و اینخو نا سال ترسیلات زراٹی ریکارڈ ودکی مسنے۔ انٹرنیشنل جہاز آتے 20درسد آ کننگانے۔ ننا درخواست آ این سی او سی یورپ، یوکے، چین، ملائیشیا و کینیڈا کن فلائٹ آپریشن تے 40درسد کرینے۔ دافتے 60آن 70درسد اسکان ودفنگ خوانہ تانکہ پیشن نا ملک پاکستانیک عئیدءِ تینا سیال و قریب آتون کننگ کیر۔ نن این سی او سی آن دابابت درخواست کرینن۔ اوپارے کہ مڈل ایسٹ انا پاکستانی تیکن 7جولائی آن خصوصی گام گیج کننگانے۔ داوخت اسکان پی آئی اے 290جہاز آن 54116پاکستانی تے وطن آ سرکرینن۔ یورپ و یوکے ٹی ننا جہاز آتیا پابندی ءِ ہنداوڑ لندن، مانچسٹرو پیرس آن خصوص چارٹرڈ جہاز آتا کمک اٹ وطن آ سرکننگک۔ ایلو پاکستانی تے ہم وطن آ پدی اتنگ کن غٹ گام گیج کننگ انگ ءِ۔
