اسلام آباد۔ 09جولائی (اے پی پی) سرکاری آفیسر آتا کارکڑد رپورٹ ءِ السی غاوتا ایسری اتون گنڈنگ نا فیصلہ ءِ کننگانے۔ وزیراعظم ڈیلیوری یونٹ نا کنڈآن جاری بیان نا رداٹ السی غاوتا ایسری کن وزیراعظم عمران خان نا وژن نا رداٹ اسہ پین تاریخی ءُ گام اس ہرفسا سرکاری آفیسر آتا کارکڑد رپورٹ ءِ السی غاوتا ایسری اتون گنڈنگ نا فیصلہ ءِ کننگانے و سرکاری آفیسر آتا اے سی آر اٹی السی غاوتا ازالہ غا کارکڑد نا درجہ و نمبرتننگ نا سلاہ ءِ تننگانے۔ بیان نا رداٹ وزیراعظم نا پارت آتیا اسٹیبلشمنٹ ڈویژن ءِ وڑوڈول اس جوڑ کننگ نا مراسلہ جاری کننگانے۔ مراسلہ ٹی پاننگانے کہ الس نا غاوتے ایسر کننگ ہر آفیسر نا اولین زمواری مرے۔، غاوتا دمدستی ایسری و الس نا است جمی سرکاری آفیسر آتا کارکڑد ءِ ہُننگ نا گچین ءُ وڑوڈول اسے۔ مراسلہ ٹی پارت کننگاکہ سرکاری آفیسر آتا اے سی آر اٹی السی غاوتا ایسری نا بابت کارکڑد ءِ اوار کننگ نا وڑوڈول اس جوڑ کننگے۔
