اسلام آباد۔ 09جولائی (اے پی پی) وزیرخارجہ مخدوم شاہ محمود قریشی پارینے کہ نن مستین آن سبخ ہلسا آخبت نا حکمت عملی اس جوڑ کننگ اُن، اوغانستان اٹی ننا ہچ کس فیورٹ اف، پاکستان نا اوغانستان آ پالیسی پیدوار ءِ، نن اوغانستان اٹی امن و سوگوی خوانہ۔ وزیرخارجہ جمعہ نادے آ چیئرپرسن سینیٹر شیریں رحمان نا کماشی ٹی سینیٹ نا قائمہ کمیٹی امور خارجہ نا اولیکو دیوان اٹی گپ وتران کریکہ۔ داکان مست چیئرمین سینیٹ قائمہ کمیٹی امور خارجہ وزیرخارجہ مخدوم شاہ محمود قریشی و خصوصی کمکار قومی سلامتی معید یوسف و ایلو کمیٹی نا باسک آتے بخیر اٹ پارے۔ وزیرخارجہ مخدوم شاہ محمود قریشی سینیٹ قائمہ کمیٹی ٹی گپ و تران کرسا پارے کہ منہ وخت مست وزارت خارجہ ٹی غٹ پارلیمانی راہشون تے اوغانستان نا بدل مروک آ حالیت آتیا حوال تننگا، ہمو دیوان اٹی فیصلہ مس کہ ادارہ غاتا کنڈآن پارلیمان نا باسک آتے ڈیہہ نا حالیت آتیا حوال تننگے۔ پارلیمانی راہشون تا است خواہی آ ادارہ غاتا کنڈآن پارلیمنٹ اٹ 8گھنٹہ نا سرجم حوال تننگا، ولے دانشست اٹ بیرہ اوغانستان آ گپ وتران مننگ کرے۔ وزیرخارجہ پارے کہ کوشست ءِ کہ ارٹ میکو نشست بھلا عئید آن مست مننگ کے۔ وزیرخارجہ پارے کہ اینو امریکہ نا سپوکس پرسن پاننگ ءِ کہ پاکستان ننا تعمیری شریدار ءِ، اونا رداٹ اوغانستان اٹی اونا و پاکستان نا مزل اسٹ ءِ۔ مسٹ میکو ہیت او پاکستان بیرہ اوغانستان نا نظراٹ ہُننگ خواپک، او خواہک کہ 31اگست اسکان اوغانستان آن انخلاء پورو مریک ولے پاکستان و ڈیہہ تون امن کن اسہ رشتہ اس استوار سلے،ننے داڑآ ہچ ءُ اعتراض اس اف۔ وزیر خارجہ پارے کہ اینو مچ آ دنیا ننا موقف ءِ امنا کننگ آ بیوس ءِ کہ اوغانستان نا ویل انا ہچ ءُ فوجی ایسری اس اف۔ اوپارے کہ ننا سوچ ئس کہ انخلازموارانہ مرے تانکہ منفی قوت اس خلاآن فائدہ ہرفپ، نن خواہسونہ کہ انخلاء و اوغان امن عمل اوار اوار برجاسلر، دا(امریکہ) نا پاننگ ءِ کہ اوتینا مسخت ءِ دوئی کرینے، دامسخت آتے صدر بائیڈن بیان کرینے۔ اونا رداٹ اونا مسخت 11/9نا زموارآتے کیفرکردار اسکان سرکننگ ئس ہراپورو مس۔ اونا مسخت اوغانستان اٹی ساڑی دہشت گرد تنظیم تے داخہ در نزور کننگ ئس کہ او آخبت پین کس اسے شست کننگ کپس۔ اوسمجھک کہ او ہدف آتے او دوئی کرینے، اوپاہک کہ نن اوغانستان اٹی نیشن بلڈنگ کن ہنتویسن۔، اوغانستان نا ویل ءِ اوغان تے اواری اٹ تولسا ایسرکننگ نا ءِ، و نن ہم ہنداپاننگ اُن۔ وزیر خارجہ پارے کہ اونا نکتہ نظر دادے کہ انخلاء غان پد ہم او انسانی بنداوتیا کمکاری ءِ برجاتخک، او ڈپلومیٹک ساڑی گری تخنگ خواہک، او کابل ایئرپورٹ نا سیکورٹی کن کمک فراوان کننگ نا عندیہ ہم تننگ ءِ۔ اوزلمے خلیل زاد ءِ پارت کرینے کہ او جامع مذاکرات نا کمک اٹ اوغان ویل انا سیاسی ایسری کن رابطہ غاتے برجاتخک۔ وزیرخارجہ پارے کہ ننا اینو امریکی سیکرٹری خارجہ بلنکن تون ہیت گمانی ءِ، ای اونا مون آ پاکستان نا نکتہ نظر ءِ تخیوہ۔ وزیرخارجہ نا پاننگ ءِ کہ امریکہ تینا مسکوہی حلیف آتے رکھ فراوان کننگ نا باوری کرفینے۔ وزیرخارجہ پارے کہ اینو دوحہ معاہدہ و بین الاوغان مذاکرات نا بابت پاکستان نا کڑد انا ستاءِ کننگ انگ ءِ۔ دوحہ معاہدہ ٹی طالبانک انخلاٹی جلہو کپننگ نا قول کریر و اودامعاہدہ نا پاسداری ءِ کریر، ہرادے امریکہ امنا کیک۔ اوغان باہوٹ آتا بابت شاہ محمود قریشی پارے کہ نن جہانی کمیونٹی ءِ باور کرفے نم باہوٹ آتے گیرام کرینورے۔ نن خوانہ کہ اوغان باہوٹ آتا باعزت وطن آ پدی ہِننگ ءِ اوغان امن عمل نا بشخ جوڑ کننگے۔ اوچینی کڑد انا بابت پارے کہ چین اگہ اوغانستان اٹی سوگوی کن گام اس ہرفک تو جوان ءُ ہیت اسے۔ استنبول پراسس اٹی طالبانک بننگ آن انکارکریر ولے نن اوغانستان و ترکی تون سہ کڑدہ ئی دیوان اس کرین۔ پاک ایران تعلقداری تا بابت وزیر خارجہ پارے کہ ایران تون ننا تعلقداری پین سوگو مس، تہران تون ننا باڈر مارکیٹ آتا معاہدہ مس وخت اس کہ پوسکن آ ایرانی صدر تون وزیراعظم نا گچین گپ وتران مس۔ داکان بیدس اوغانستان نا بابت ایران نا کڑد اہم ءِ داڑآن نظرءِ اسہ کنڈ کننگ مفک۔
