اسلام آباد۔08جولائی (اے پی پی) وزیراعظم نا خصوصی کمکار امور نوجوانان عثمان ڈار پارینے کہ نیشنل یوتھ کونسل ءِ میرٹ آ ٹہیفنگانے، ورناتا بابت ڈیٹایکجاکننگ اُن، داڑآن اوفتا آخبت نا بابت ڈٹ سازی ٹی کمک رسینگک۔ داخیال آتا درشانی ءِ او پنچ شنبے نادے آ نیشنل یوتھ کونسل نا باسک آتا سوغندی دود آن تران کرسا کرے۔ اوپارے کہ نیشنل یوتھ کونسل نا باسک آتے میرٹ آ گچین کننگانے۔ چندی بشخ آتون وابستہ ورناتے شاندار کارکڑد نا بنداو آ نیشنل یوتھ کونسل کن گچین کننگانے۔ اوپارے کہ نیشنل یوتھ کونسل نا گچین ورناک قومی و جہانی کہول آ چندی بشخ آتے ٹی تینا ملک انا نمائندگی ءِ کیرہ۔ داورناتا مہارت آتے ہرسا اوفتا ورکنگ گروپس ٹہیفنگانے۔ اوپارے کہ نیشنل یوتھ کونسل نا باسک آک داسہ انفرادی حیثیت تخپسہ بلکن ہموغٹ ورناتا نمائندگی ءِ کیرہ و او ورناتے کن رول ماڈل نا حیثیت تخرہ۔ اوپارے کہ وزیراعظم عمران خان نا وژن ءِ کہ ورناتے پاور کوریڈور اسکان پورو رسینگ تننگے۔ اوفتے تعلقدار بشخ اٹ نمائندگی تننگے تانکہ ورناک تینا ویل آتا بابت ہیت کننگ کیر۔ ورناتے بے پرخ وارخواہی فراوان کننگ کن گام گیج کننگ اُن۔ ورناتا ویل آتا ایسر کننگ کن ہرممکن گام گیج کننگ اُن۔ اوپارے کہ سرسہب ورناسرسہب پاکستان ءِ۔ اومیت ءِ ہرامسخت کن داکونسل ءِ ٹہیفنگانے اوپورو مریک۔ دودآن بنجائی وزیر ڈٹ بندی، شونداری اصلاحات و خصوصی گام گیج اسدعمر ہم تران کرے۔ دوداٹی نیشنل یوتھ کونسل نا پوسکن گچین مروک آ باسک آتیان سوغند ہم ہلنگا۔
