اسلام آباد۔ 08جولائی (اے پی پی) بنجائی وزیر داخلہ شیخ رشید احمد پارینے کہ حکومت پاکستان غٹ درملکی تا رجسٹریشن ءِ کننگ نا فیصلہ کرینے، 40آن 50ہزار بندغ، ہرا تدوک آ 70سال اٹی پاکستان اٹ پترینگار، بے گواہ مسر، اوفتا ہچ ءُ ریکارڈ اس اف۔ طورخم بارڈر آ 4آن 5ہزار اختہ پاکستانی تیکن سیم ءِ ملنگ نا فیصلہ کرینن، ایلئن کارڈ آاکاؤنٹ، سم ملنگ و کاروبار کننگ نا موکل تننگک، منشیات نا برخلاف اسلام آباد اٹی بھلو کچ اسے آ کارروائی کننگک۔ پاکستان اٹی بھلو کچ اسے آ ایلو ملک آتیان بننگ ءُ، آزاد کشمیر نا گچین کاری تیٹی پاکستان تحریک انصاف سرسہب مرسا حکومت جوڑ کیک۔ داخیال آتا درشانی ءِ او پنچ شنبے نادے آ نیشنل فرانزک سائنس ایجنسی نا دورہ نا وخت آ میڈیا تون گپ وتران کرسا کرے۔ وزیرداخلہ پارے کہ پاکستان تحریک انصاف آزاد کشمیرنا گچین کاری تیٹی سرسہبی دوئی کیک و حکومت جوڑ کیک۔ گچین کاری مہم ءِ چلیفنگ سیاسی سرکڑدہ و اپوزیشن نا حق ءِ۔ جوان ءُ ہیت اسے کہ اپوزیشن راہشون ہم گچین کاری مہم اٹی پبی بشخ ہلنگ ءُ ولے اپوزیشن ءِ الس نا مخ تفی دوئی اف۔ اوپارے کہ ای ہم آزاد کشمیر نا گچین کاری تیٹی پی ٹی آئی نا سرسہبی کن مہم چلیفنگ اُٹ۔ قوم عمران خان ءِ بروک آ گچین کاری تیٹی ہم وونٹ ترسا سرسہب کیک ولے ننے تینا کارکڑد ءِ پین گچین کروئی مریک۔ وزیر داخلہ پارے کہ یکم اگست آن چمن اٹ بارڈرآ ہن و برکن الیکٹرانک نظام کاریم نا بناءِ کیک۔ وزیر داخلہ پڑوکرے کہ این سی او سی نا فیصلہ نا رداٹ ہرابندغ آتا ویکسی نیشن مسنے اوفتے کن طورخم نا سیم ءِ ملنگ اُن۔ اوغانستان اٹی کورونا نا دین انا ویل زیات ءِ۔ دابابت این سی او سی نا سرکڑدہ غاتون ہیت کیوہ۔ اوپارے کہ سعودی عرب و مڈل ایسٹ ہننگ نا خواہندار 4آن 5ہزار پاکستانی طورخم بارڈرآ اختہ مسنو ہرافتا کورونا ٹیسٹ نیگٹیومریک او اُراتیان ہِننگ کیرہ و ہرانا پازیٹیومریک اوفتا بارواٹ این سی اوسی لائحہ عمل اس طے کیک۔ وزیرداخلہ ایلئن کارڈ تخوک آ بندغ آتے کن بینک اکاؤنٹ ملنگ، سم دوئی کننگ و کاروبارکننگ نا موکل تننگ نا پالیسی نا ہم پڑو ءِ کرے و پارے کہ ہرافتا ویزہ چٹے او وزارت داخلہ تون رابطہ کننگ کیرہ۔ اوغٹ درملکی تے رجسٹرڈ کننگ نا فیصلہ نا پڑو ءِ کرے و پارے کہ ننا کوشست ءِ کہ ہراحالیت جوڑ مننگ ءِ اونا رداٹ ہردرملکی نا رجسٹریشن ءِ کننگے۔ جعلی شناختی کارڈ جوڑ کروک آتے ہلنگانے۔ اوپارے کہ پاکستان اٹی 40آن 50ہزار بندغ 70سال آن بے گواہ ءُ۔ دافک پاکستان اٹ پترینگار و اوکان پد اوفتا ہچ سمااف۔ اوپارے کہ آن لائن ویزہ نا جاری کننگ نا نظام اس وضع کننگانے۔ اسہ سوج اسے نا ورندی ٹی اوپارے کہ ٹی ایل پی نا بابت فیصلہ کابینہ کیک۔ کابینہ نا بروک آ دیوان اٹی اوفتا کیس پیش مریک۔
