اسلام آباد۔ 08جولائی (اے پی پی) بنجائی وزیر صنعت وپیدوار مخدوم خسروبختیار پارینے کہ ہرالیڈر ءِ قوم و ملک انا دڑد مرے تو او گچین تیان مون آ سجفک، مستین اٹ اسہ حکومت اس ہم پاکستان نا زرگزرانی بنداوتے سوگو کتویسس ولے داسہ پاکستان نا زرگزران سوگو ءِ و انشاء اللہ پاکستان دنیا ٹی گچین ءُ ہنداس دوئی کیک۔ وزیراعظم عمران خان نا وژن نا رداٹ گچین کاری تیان مون انا سوچ آ عملدرآمد کننگانے ہراڑآن ننا نسخان چٹانے، تدوک آ مالی سال اٹی قومی زرگزران نا شرح نمو 4درسد ئس وخت اس کہ اینخو مالی سال اٹی 5درسد اسکان ودک۔ پنچ شنبے نادے آ داڑے الیکٹرک موٹرسائیکل نا بنائی دود آن تران کرسا اوپارے کہ پاکستان اٹی آٹوو الیکٹرک گاڈی تا پالیسی اس درستی راستی کرفنگ ءِ ہرانا رداٹ بروک آ 2آن 3سال اٹی کارتا پیدوار ءِ 5لکھ یونٹ اسکان ودفنہ۔ بروک آ اسہ سال اٹی پیدوار اٹی اسہ لکھ یونٹ نا ودکی مریک و 3لکھ روزگار نا پوسکن ءُ وارخواہی ودی مریک۔ اوپارے کہ اینخو نا سال موٹرسائیکل آتا ہندی پیدوار 30لکھ یونٹ اسکان ودنگ آن نوکری تا پوسکن آ وارخواہی ودی مننگ و خلقی زرگزران شون ہلیک۔ بنجائی وزیر پارے کہ الیکٹرک وہیکل پالیسی نا تیاری آ ڈاکٹر امجدمبارکبادنا حقدار ءِ۔ داپالیسی نا رداٹ غٹ آن مست ٹویوٹا پیدوار نا بناءِ کرینے وخت اس کہ 17پین کمپنی ہم لیسن خواہنگ ءُ۔ اوپارے کہ الیکٹرک وہیکلز پالیسی نا رداٹ کلین اینڈ گرین پاکستان نا وژن ءِ پورو کینہ۔ ای وی پالیسی نا تیاری آ وزارت توانائی، مواصلات و ڈٹ بندی آن بیدس ایلو شریدارآک ہم مبارکباد نا حقدار ءُ۔ بنجائی وزیر پارے کہ پاکستان اٹی موٹرسائیکل آتا تیاری نا بابت ریگولیٹری فریم ورک اس جوڑ کینہ۔ الیکٹرک موٹر سائیکل نا تیاری آن پٹرول نا کھپ اٹ کمتی بریک و تیل انا درآمدی بل کم مریک۔ ہراڑآن نہادی زرمبادلہ نا بچت مریک۔ اوپارے کہ وزیراعظم نا مرہُننگ نا پالیسی آن تیل و ایل این جی پین پین نا درآمدات کم مریک۔ وزیراعظم نا وژن نا رداٹ ملک اٹی ہائبرڈ چاگڑد اس جوڑ کننگ انگ ءِ۔ بدبختی اٹ نن 60درسد بجلی درآمدی فیول آن ودی کننگ اُن ولے داسہ ہندی وسیلہ غاتیان بجلی نا پیدوار اٹی ودکی آن پاکستان و الیکٹروہیکلز سیکٹر ہندی وڑاٹ اڑزآن بجلی آن فائدہ ہرفک ہراڑآن تیل انا درآمد کم مریک و پاکستان ءِ سرسوز و شاداب ملک اس جوڑ کینہ۔ بنجائی وزیر پارے کہ بروک آ تُو آٹوپالیسی اس کابینہ ٹی اتنگ اُن ہرانا رداٹ اسہ اِراسال اٹی گاڈی تا پیدوار اٹی 2آن 3لکھ یونٹ آتا ودکی ناہدف ءِ۔ اوپارے کہ ای وی پالیسی تون اوار اوار حکومت گاڈی تا درآمد ءِ اڑزآن کرینے تانکہ الیکٹرک گاڈی تا چارجنگ نا پوسکن آ سیکٹراٹی زرکاری مرے و مخلوق ءِ روزگار رسینگے۔ اوپارے کہ الیکٹرک وہیکل پالیسی نا اہم بشخ چارجنگ نا انفراسڑکچر ءِ ہراڑآن پاکستان نا زرگزران شون ہلیک و روزگارنا وارخواہی ودک۔ اوپارے کہ وزیراعظم عمران خان نا کماشی ٹی پاکستان سوگو زرگزران نا کنڈآ ہِننگ ءِ۔ اوپارے کہ ملک اٹی گاڈی و موٹرسائیکل آتا پارٹ تیارکننگ انگ ءِ ولے اوفتے کن خام مال درآمد کروئی تمک۔ حکومت ہندی خام مال آن فائدہ ہرفنگ ءِ پک کیک و موٹرسائیکل آتا برآمدآتے ایلو ملک آتسکان ودفنگ کن گام گیج کننگک۔
