اسلام آباد۔ 08جولائی (اے پی پی) وزیراعظم عمران خان پارینے کہ ساڑی حکومت مریس مدتی ڈٹ آتا رداٹ بروک آ چین تے موسمیاتی بدلی و جہانی تہوش اٹی ودکی نا منفی اثرآتیان رکھ تخنگ کن چاگڑد دوست روڈ میپ اس جوڑ کننگ آ کاریم کننگ ءِ۔ دارداٹ چاگڑد دوست الیکٹرک موٹرسائیکل (ای بائیک) نا ڈٹ ستاکڑزک ہرا کلین اینڈ گرین پاکستان مہم نا چرجوئی ٹی حکومت نا الیکٹرک وہیکل پالیسی نا اہم ءُ جزو اسے، نن ملک ءِ اسہ پوسکن ءُ سمت اس ایتنہ و بروک آ چین تا بارواٹ سجفنہ، چاگڑدنا بشخ انا گچینی و گلوبل وارمنگ نا بابت پاکستان نا گام گیج آتے اولیکو وار جہانی برادری امنا کننگ ءِ، اللہ تعالیٰ پاکستان ءِ بے پناہ وسیلہ تسنے، ساڑی حکومت دا وسیلہ غاتا گچین کاری اٹ اتنگ نا ڈٹ بندی کننگ ءِ۔ وزیراعظم داخیال آتا درشانی ءِ پنچ شنبے نادے آ داڑے پاکستان نا اولیکو چاگڑد دوست الیکٹرک موٹرسائیکل نا بنائی دود آن تران کرسا کرے۔ وزیراعظم پارے کہ دا گام ءِ آخبت نا سوچ انار داٹ ہرفنگانے، ہرا الیکٹرک وہیکلز پالیسی کلین اینڈ گرین پاکستان نا مہم نا بشخ اسے و داپالیسی نا رداٹ اسہ سوگو ءُ الیکٹرک وہیکل نا ہدف اس مقرر کننگانے و دانار داٹ آٹوموبائل نا صنعت ءِ مرحلہ وار گدریفنگک و الیکٹرک وہیکل مینو فیکچررز ءِ آسراتی ہم تننگ انگ ءِ۔ داچاگڑد دوست پالیسی آن ملک اٹی تہو، دیر و شارتے ساف تخنگ اٹ کمک رسینگک۔ وزیراعظم بنجائی وزیر حماد اظہر و خسروبختیار ءِ الیکٹرک وہیکلز پالیسی اس مرتب کننگ آ ہم مبارکبادی تس کہ اودا پالیسی ءِ مرتب کرسا ملک انا آخبت نا سمت نا تعین ءِ کرینو۔ اوپارے کہ اینو اسکان اخس کہ ملک شون ہلکونو اوفک مدام آخبت نا سجفینو۔ وزیراعظم پارے کہ چین انا شونداری نا پد اٹ 10، 20و 30سال انا مریس ڈٹ بندی ءِ۔ اوپارے کہ اگہ مریس مدتی پالیسی اختیار کننگپ تو ملک اٹی الیکشن ٹو الیکشن فیصلہ مریک ہراڑآن مافیاک فائدہ ہرفسا تینا فائدہ ٹی فیصلہ کیرہ و ملک شون ہلپک۔ اوخواجہ نبی کریم ﷺ نا فرمان نا حوالہ ءِ ترسا پارے کہ ”نن بروک آ زنداکن ہندن زندہ مرین کہ ننے پگہ ہنوئی ءِ ولے دنیا ٹی رہینگ انگ کن آخبت نا ڈٹ بندی بایدے کننگے۔ اوپارے کہ بدبختی اٹ پاکستان ہمو ملک ءِ ہراڑے جنگل آتا دسنگ نا رقبہ بھاز ککم ءِ، نن انگریز آتا دور اٹی خلوک آ جنگل آتے ہم بھس کرینن۔ وزیراعظم پارے کہ حکومت بلین ٹری ڈٹ انا رداٹ پوسکن ءُ درخت خلنگ ءِ، نیشنل پارک جوڑ کننگ انگ ءِ، شارتا ماسٹر پلان جوڑ کننگ انگ ءِ تانکہ شاری آبادی تا بے ہنگم ودکی ءِ توننگ مرے۔ اوپارے کہ تدوک آ 20سال اٹی اسلام آباد نا آبادی ترندی اٹ ودانے ولے داڑکن جوان ڈٹ بندی الوکہ ولے نن باقاعدہ ڈٹ بندی نا رداٹ شارانا بست وبند ءِ گچین کینہ۔ اوپارے کہ آبادی ٹی ودکی و ڈٹ بندی نا کمتی نا سوب آن اسلام آباد اٹی کچٹی ودانے وخت اس کہ لاہور و پشاور تون اوار کراچی ٹی ہم چاگڑدنا ویل مون تروک ءِ۔ وزیراعظم پارے کہ کچٹی ٹی ودکی نا سوب لاہور اٹی رہینگوک آ شاری تا زند کم و ود 11سال کم مننگ کیک۔ اوپارے کہ الیکٹرک وہیکلز پالیسی آن شاری کچٹی ءِ چٹفنگ اٹ کمک رسینگک انتئے کہ شارتے ٹی موٹرسائیکل آتا کاریم اٹ اتنگ بھاز زیات مریک و الیکٹرک موٹرسائیکل آن کچٹی ٹی کمتی اتنگ اٹ کمک رسینگک۔ وزیراعظم عمران خان پارے کہ حکومت الیکٹرک وہیکلز پالیسی ءِ پین گچین کننگ کن گام گیج کیک تانکہ کچٹی و چاگڑد نا ویل آتے کم کننگ مرے۔ اوبنجائی وزیر حماد اظہر ومخدوم خسروبختیار ءِ الیکٹرک وہیکلز نا پالیسی نا بابت گام گیج آتیا مبارکبادی تس۔ وزیراعظم ڈاکٹر امجد ءِ الیکٹرک موٹرسائیکل درستی راستی کرفنگ آ خراج تحسین پیش کرساپارے کہ نی آخبت نا سوچ انا رداٹ دا گام ءِ ہرفینس ہراستاکڑزک۔ اوپارے کہ حکومت نا زرگزرانی ٹیم الیکٹرک وہیکلز نا پالیسی ءِ مرتب کرسا ملک انا آخبت نا پلان اس تسنے کہ حکومت نا سمت انت ءِ۔ اوپارے کہ خداتعالیٰ ننے بے شمار نعمت تسنے ولے نن دانعمت آتیان فائدہ ہرفتون و ہرگڑاءِ پیشن آن درآمد کننگ نا آسان کسر اس گچین کرین ہراڑآن دا نسخان مس کہ نن تینا خام مال ءِ کاریم اٹ اتنگ کتون و ملک غریب مرسا ہنا۔ اوپارے کہ درآمد آتے ٹی ودکی آن زرتس نا توازن زہمی مریک و ملک انا واپاری نسخان اٹی ہم ودکی مریک۔ اگہ برآمد آتے ٹی ودکی آن زیات ڈالر ملک اٹ برے تو ملک ہزگار مریک وخت اس کہ داکان چپ درآمد آتا ودنگ آن ملک نیزگارمریک۔ اوپارے کہ چین برآمد آتا مون آ دننگ نا پالیسی آن زیات آن زیات ڈالر کٹیاکرے و اینو دنیا نا اسہ بھلو زرگزرانی واک اس جوڑ مسنے۔ ہنداوڑ ہرسا ہرسا سنگاپور ہم شونداری نا مزل آتے طے کرے۔ وزیراعظم پارے کہ تدوک آ مالی سال اٹی ننا برآمدآک ودسا26ریکارد ارب ڈالر اسکان سرمسر ولے ایلو کنڈآ اسہ چنکو ملک اس سنگاپور ءِ ہرانا برآمدآک 300ارب ڈالر ءُ۔ سنگاپور اٹی دا غٹ ءِ ڈٹ بندی نا رداٹ دوئی کننگانے۔ اوپارے کہ پاکستان اٹ معدنیات نا فراوانی ءِ، نن تون ہرگڑارے، ننا ملک بھازامیر ءِ و ننے درآمد آتا گرج اف ولے داڑکن ننے تیناوسیلہ غاتیان فائدہ ہرفوئی مریک۔ اوپارے کہ درآمدآتیان ملک ءِ نسخان مریک۔ زرتس انا چرجوئی ٹی روپئی آ بھاریم تمنگ آن اونا قدر کم مریک ہراٹی کبینی و نیزگاری نا ودنگ تون اوار اوار ملک نیزگار مریک۔ وزیراعظم عمران خان پارے کہ نن ملک ءِ اسہ پوسکن ءُ سمت اس ایتنہ و بروک آ چین تا بارواٹ سجفنہ۔ اوپارے کہ چاگڑد نا بشخ انا گچینی و گلوبل وارمنگ نا بابت کروک آ پاکستان نا گام گیج آتے اولیکو وار جہانی برادری امنا کننگ ءِ۔ داکان مست بنائی دود آن تران کرسا بنجائی وزیر خسرو بختیار پارے کہ ہرالیڈر ءِ ملک انا دڑد مریک ہمو گچین کاری تیان مون آ سجفک۔ اللہ تعالیٰ نا کرم ءِ کہ وزیراعظم عمران خان ہم آخبت نا سوچ آ جوانی اٹ عمل کرینے۔ اوپارے کہ وزیراعظم نا کماشی ٹی پاکستان نا زرگزران پائیدار و سوگو مسنے و پاکستان دنیاٹی گچین ءُ ہند اس دوئی کیک۔
