اسلام آباد۔8جولائی (اے پی پی): مزن وزیر عمران خان ءَ گوشت کہ کورونا ءِ چارمی فیز ءِ تر س انت، بھارت ءَ چہ شنگ بوھوکیں وائرس گیش ھتر ناک انت۔ الس رکھینگی رھبند آناں پد ءُ رند ممہ کنت گڈاس دوارگ ءَ لاک ڈائون ءِ نیمگ ءَ روگ کپ ایت، ایشی ءَ چہ گریبیں تبک ءِ مردم آناں تاوان رسیت۔ پنچ شمبے ءِ روچ ءَ کورونا ھوپ ءِ استیں جاور ھال آنی بابت ءَ ھیال آنی درشانی ءَ کان ءَ مزن وزیر ءَ گوشت کہ ما کورونا وائرس ءِ استیں جاور ھال آنی چار ءُ تپاسی کتگ، دگنیا ءِ جتا جتائیں ملک آنی بازیں نمونگ ءِ وائرس است انت، اے وھد ءَ پڑ ءَ درستاں چہ گیش ٹوھ تریں جیڈھ بھارت ءَ چہ شنگ بوھوکیں وائرس ایگ انت، ایشی ءَ بنگہ دیش، اوگانستان ءُ انڈونیشیا ءَ را ھم وتارا گوں پتاتگ۔ اوگانستان ءَ آکسیجن ءِ کمی بیت، انڈونیشیا ءَ ھم انچیں جاور انت ءُ مردم اے وائرس ءَ مرگ ءَ انت، اللہ پاک ءَ مئے سر ءَ باز رحم کتگ، بنی آدم ھرچی کوشست بکنتت کامیابی اللہ پاک ءِ دست ءَ انت۔ مزن وزیر ءَ گوشت کہ نامداریں میاں اوستمانی تاکبند اکانومسٹ ءِ رپوٹ ءِ رد ءَ پاکستان ءَ را کورونا ءَ گوں جوانتریں رپک آں گوں گر ءُ چیل بوھگ ءُ وتی الس ءَرا رکھینوکیں ملک آنی لڑ ءَ سیمی نمبر ءَ پاکستان انت۔ مزن وزیر ءَ اے رد ءَ این سی او سی ءِ کرد ءَ را ساڑات ءُ گوشت کہ این سی او سی ءَ جاور جوانیں رنگ ءَ چار ءُ بچار کتگ ءُ وھد ءُ موہ ءِ سر ءَ پیسلہ کتگ۔ مزن وزیر ءَ را ج ءَ را توسیپ ءُ ستا پیش کت ءُ گوشت کہ پاکستانی راجے ھم ٹوھیں کرد ات۔ ایشی ءِ سبب ءَ ھرابیں جاور آں چہ ما رکھ اتگ انت۔ آئی ءَ گوشت کہ راج ءَ حکومت ءِ دست بندی ءَ را پد ءُ رند کنان ءَ رکھینگی رھبند آنی سر ءَ کار کتگ، پاکستان ھما ملک بوتگ کہ آھوادا رمضان المبارک ءِ ھم مسیت پچ بوتگ انت وھدیکہ سرجمیں دگنیا ءَ مسیت بند بوتگ انت۔ الس ءَ حکومت ءِ پیسلہ آنی گوما ھمبراھ داری کتگ ءُ ایس او پیز آنی پد ءُ رند کتگ بلے نوں کیس آنی کساس دوارگ ءَ چہ گیش بوھگ ءَ انت ھاسیں رنگ ءَ بھارتی نمونگ ءِ وائرس ھم گوں ترندی ءَ شنگ ءُ تالان بوھگ ءِ ترس انت۔
