اسلام آباد۔ 07جولائی (اے پی پی) وزیراعظم عمران خان پارینے کہ پاکستان 74سال اٹی اولیکو وار نہادی خل، زیور و معدنیات آتا بشخ ءِ برآمدی صنعت جوڑ کننگ والا ءِ۔ داخیال آتا درشانی ءِ او جیمز، جیولری و منرلز ٹاسک فورس انا دیوان نا کماشی ءِ کرسا کرے۔ دیوان اٹی بنجائی وزیر صنعت مخدوم خسرو بختیار، خصوصی کمکار ڈاکٹر شہباز گل، چیئرمین جیمز اینڈ جیولری ٹاسک فورس انجینئر گل اصغرخان، عاطف خان، ٹاسک فورس انا باسک آک و تعلقدار بڑزکو آفیسر آک ساڑی ئسر۔ دیوان اٹی وزیراعظم ءِ ٹاسک فورس انا جیمز، جیولری و منرلز بشخ انا اول سرآن ٹہیفنگ و سلاہ ئی منرل سٹی آ سلاہ و سوج پیش کننگا۔ دیوان ءِ پاننگاکہ پاکستان اٹی نہادی خل تا برآمد آتا بابت 5ارب ڈالر سالانہ نا لائخی ساڑی ءِ ہراڑتون اوار اوار ملکی زرگزران آ مثبت اثر و لکھ آ نوکری ودی مریک۔ پاکستان اٹ داوخت آ 99 وڑنا نہادی خل تا کوڑی ساڑی ءِ و دابشخ اٹی پیدوار نا بابت پاکستان دنیاٹی ہشت میکو بھلا ملک ءِ۔ پین داکہ محتاط کساس نا رداٹ پاکستان اٹی سالانہ 200ٹن خیسن نا کھپت ءِ۔ دابشخ انا بابت گچین کانود جوڑ کننگ و گچین بست وبند آن اودے اسہ بھلو برآمدی صنعت اسے ٹی بدل کننگک۔ دیوان ءِ پاننگاکہ جیمز و جیولری ءِ صنعت نا درجہ تننگانے و ٹاسک فورس انا لائحہ عمل نا رداٹ داڑآ عملدرآمد ءِ پک کننگک۔ برآمد آتے ودفنگ کن ایکسپورٹ پروموشن آ خاص چکار کننگک ہراڑکن پاکستانی سفارت خانہ غاتیان ہم کمک ہلنگک۔ داکان بیدس جیمز اینڈ جیولری سٹی اس جوڑ کننگک ہراڑے وسیلہ غاتے اسہ جاگہ غا مچ کننگ، بشخ ءِ مون تروک ویل آتا ایسری کن ون ونڈو آپریشن فراوان کننگ و زرکارآتے آسراتی فراوان کننگ ءِ پک کننگک۔ بنائی وڑاٹ ساڑی آ وسیلہ غاتے کاریم اٹ اتسا پبلک پرائیویٹ پارٹنر شپ ماڈل اس تینا کننگک۔ پین پاکستان جہانی منڈی تسکان رسینگ کن بشخ انا بابت سرٹیفکیشن ہم دوئی کیک۔ داٹی نئے بیرہ نہادی خل بلکن نہادی دھات آتا سٹینڈر ڈز ننے بیرہ وضع کننگک۔ بلکن ساڑی آب ءِ جہانی کہو ل آ رائج آب آ اتنگک۔ داکان بیدس دیوان ءِ ہم پاننگاکہ دابشخ اٹی پٹ وپول نا وسیلہ غاتا ساڑی گری آن پد ہم ہچ ءُ خاطرخواہ پیش رفت اس کننگتنے۔ لائحہ عمل نا رداٹ پٹ وپول نا بشخ ءِ فعال کرسا غٹ پوسکن آ سٹینڈرڈآتے درستی راستی کرفنگک۔ دیوان ءِ منرل سٹی نا جوڑ کننگ آہم سرجم حوال تننگا۔ پاکستان اٹی کیمیکل و منرل صنعت کن علاقہ نا پیدواری ءِ کننگانے ہراڑے خام معدنیات آن صنعتی ویلوایڈیشن کرسا نئے بیرہ درآمد آتے کم کننگ اٹ کمک رسینگک بلکن برآمد آتیان زرمبادلہ ٹی ودکی مریک۔ وزیراعظم داوخت آ پارے کہ حکومت معدنیات و نہادی خل تا بشخ انا روایتی وڑوڈول آتے بدل کرسا پوسکن آ ٹیکنالوجی آن دابشخ ءِ اول سرآن ٹہیفنگ ءِ۔ وزیراعظم پین پارت کرے کہ ہموغٹ وسیلہ غاتے ہرازیان مننگ ءُ اوفتے کاریم اٹ اتنگے و دالائحہ عمل آ درآمد کن باقاعدہ شیڈول مرتب کننگ تون اوار اوار زرکارآتے کن ساڑی اڑاند آتا تدارک ءِ کننگے۔
