اسلام آباد۔ 07جولائی (اے پی پی) بنجائی وزیر ڈٹ بندی شونداری و خصوصی گام گیج اسدعمر پارینے کہ اسلام آباد ءِ ”سرسوز“ جوڑ کننگ کن مستین اٹ ”ناموافق“ و ”بے وڑ“ ءُ درخت خلنگا ہراپولین الرجی نا سوب مسر، زوت ہی بناکروک آ درخت خلبو مہم اٹ ہمودرخت آتے گچین کننگک ہرااسلام آباد اٹی پولن الرجی نا سوب مفس، و اسلام آباد نا زیبائی ٹی پین ودکی کیر۔ داخیال آتا درشانی ءِ او چارشنبے نادے آ وزیراعظم عمران خان نا مچ آ ملک اٹی شجرکاری مہم نا پڑو اتون ہی وزارت ڈٹ بندی ٹی ہرابھرا اسلام آباد نا مہم نا اولیکو دیوان نا کماشی ءِ کرسا کرے۔ دیوان اٹی ایم این اے راجہ خرم نواز، وزیراعظم نا سلاہکار سی ڈی اے علی نواز اعوان و سی ڈی اے چاگڑد ڈیپارٹمنٹ نا آفیسرآک ساڑی ئسر۔ دیوان اٹی اسلام آباد کن جوان انگا ہند، پارکس، سیکٹر و درخت آتا گچینی آ سرجم گپ وتران کننگا۔ بنجائی وزیر اسد عمر پارے کہ وزیراعظم عمران خان ”پوسکن آ پاکستان“ جوڑ کننگ کن غٹ آن مست چاگڑدی کچٹی آن نجات دوئی کننگ نا عزم کریسس ہرادے ایسر اسکان سرکننگ ننا اولیت آتے ٹی اوار ءِ۔ اوپارے کہ اسلام آباد ءِ خرن خرن تخنگ کن باقاعدہ ہوم ورک کننگ نا گرج ءِ تانکہ اسلام آباد نا اسہ ہم سیکٹر اس، تدریسی ادارہ و شاہراہ اس درخت خلنگ آن محروم سلپ پین کچنار و املتاس کون آ درخت آتا گچینی ءِ کننگے ہراپولن الرجی نا سوب مفس۔ زوت بھلن مریر ہرافتے زیات دیرانا ضرورت مف۔ اسدعمر دیوان اٹی درخت خلبو مہم اٹ اسلام آباد نا ٹائیگر فورس، یوسیز و فلاحی تنظیم تے ہم اوار کننگ نا پارت کرے۔
