نادرا الیکشن کمیشن پاکستان ءِ غلطی تیان پاک و شفاف گچین کاری لڑتے جوڑ کننگ اٹ ہرممکن کمک فراوان کیک، چیئرمین نیشنل ڈیٹا بیس اینڈ رجسٹریشن اتھارٹی (نادرا) طارق ملک

اسلام آباد۔ 07جولائی (اے پی پی) نیشنل ڈیٹا بیس اینڈ رجسٹریشن اتھارٹی (نادرا) نا چیئرمین طارق ملک پارینے کہ نادرا الیکشن کمیشن پاکستان ءِ غلطی تیان پاک و شفاف گچین کاری لڑتے جوڑ کننگ اٹ ہرممکن کمک فراوان کیک۔ داخیال آتا درشانی ءِ او چارشنبے نادے آ پاکستان الیکشن کمیشن اٹ دود آن تران کرسا کرے۔ طارق ملک پارے کہ 10درسد غیر رجسٹرڈ زالبول آتا پرخ ءِ چٹفنگ کن نادرا ہلہلہ ئی بنداوتیا گام گیج ہلنگ ءِ۔ غٹ نادرا رجسٹریشن دفترآتے ٹی جمعہ نادے آ زالبول آتا رجسٹریشن کن مخصوص کننگانے۔ اوپارے کہ جمعہ نادے ءِ جتاکروک 258نادرا دفترآتے ٹی بیرہ زالبول آتا رجسٹریشن ءِ کننگک۔ زالبول آتے رجسٹریشن اٹ اولیکو شناختی کارڈ ءِ مفت فراوان کننگک۔ اوپارے کہ مچ آ ملک اٹ ساڑی 688نادرا رجسٹریشن دفترآتے ٹی زالبول آتے کن اسہ ون ونڈوکاؤنٹر اس جوڑ کننگک۔ زالبول آتا رجسٹریشن اٹ ہن و برنا ویل آتا رداٹ نادرا موبائل رجسٹریشن وین تا کچ اٹی ہم ودکی کننگک۔ مرمرانگاعلاقہ غاتے ٹی موبائل رجسٹریشن وین تا کمک اٹ زالبول آتے اوفتا درگہ غا رجسٹرکننگک۔ اوپارے کہ راجی اڑاند آتے مون آ تخسا زالبول آتا رجسٹریشن ءِ ودفنگ کن زالبول عملہ آ مبنی نادرانا دفترجوڑ کننگک۔ نادراٹی اولیتی بنداو تیا زالبول آتے نوکری تننگک۔ روزگارنا فراوانی ٹی زالبول آتا اوارمننگ ءِ پک کننگک۔ چیئرمین نادرا پارے کہ مچ آ ملک انا 154ضلع غاتا 430تحصیل آتے ٹی نادرا دفترجوڑ ءِ۔ پین 66 تحصیل آتے ٹی 14اگست اسکان پوسکن ءُ نادرا دفترہم ملنگک۔ ایلو ماندہ تحصیل آتے ٹی ہم زوت آن زوت نادرا دفتر ملنگک۔