پاکستان اٹی اقلیت آتے کس اسے آن خوفزدہ مننگ نا گرج اف، وزیراعظم نا نمائندہ خصوصی مذہبی ہم آہنگی و دے ٹک نیامی و پاکستان علماکونسل نا چیئرمین حافظ طاہر اشرفی

اسلام آباد۔ 07جولائی (اے پی پی) وزیراعظم نا نمائندہ خصوصی مذہبی ہم آہنگی و دے ٹک نیامی و پاکستان علماکونسل نا چیئرمین حافظ طاہر اشرفی پارینے کہ پاکستان غٹ انا ملک ءِ، داٹی اقلیت آتے کس اسے آن خوفزدہ مننگ نا گرج اف، آئین غٹ ءِ بریبری نا حق ایتک، پاکستان چندی مذہب آتا ملک ءِ، مسلمان تا زمواری ءِ کہ اقلیت آتا خیال ءِ تخر، پاکستان اٹی اقلیت آتے ہچ ءُ خطرہ اس اف، ہندا بین المذاہب و ہم آہنگی نا نظریہ ءِ، ننے رویہ غاتے ٹی بدلی اتنگ نا گرج ءِ، نن بایدے اسہ ایلو نا خیال ءِ تخن۔ داخیال آتا درشانی ءِ او ہندی ہوٹل اٹ قومی کانفرنس زالبول آن تران کرساکرے۔ داوخت آ طاہر اشرفی پارے کہ چرچ آ جلہو مس تو مدرسہ نا چناک ٹھپی مروک آتے دتر تسر، ہراتم مسیت آ جلہو مس تو مسیحیک مسلمان تے دتر تسر۔ پاکستان ءِ جوڑ کننگ اٹ غٹ مذہب نا مخلوق کڑد ادا کرے۔ پاکستان اٹی مسلمان تا زمواری ءِ کہ او اقلیت آتا خیال ءِ تخر۔ اوپارے کہ بطور مسلمان ننا زمواری ءِ کہ اقلیت آتا خیال ءِ تخن۔ داڑے اقلیت آتے ہچ ءُ خطرہ اس اف۔ اوپارے کہ وزیراعظم عمران خان نا وژن ءِ مون آ درسا ہِننگ اُن۔ مذہب، سیاست، واک و ایلوتا حق ءِ ہذف کننگ کن الیپنہ تانکہ پاکستان نا ہر شاری وتواجہی اٹ زندہ مرے۔ طاہر اشرفی پارے کہ ہرااسہ انسان اسے نا خون ءِ کرے اومچ آ انسانیت نا خون ءِ کرے۔ ہراسٹ اسٹ اسے نا جان ءِ بچفے اومچ آ انسانیت ءِ بچفے۔ ننا خواجہ رسول اللہ ﷺ رحمت العالمین ءِ۔ اسلام آن مست مسن تے زندہ درگور کننگاکہ۔ اسلام ایڑھ، لمہ ءِ اصل ہند تس۔رسول اللہ ﷺ ہراتم مدینہ منورہ غا ہناکہ تو غٹ آن مست ماراتون ملاکہ و واپسی آ ہم مسڑتون ملاکہ۔ اسلام نئے بیرہ زالبول ءِ پڑدہ نا پرمان کیک بلکن نرینہ غاتے ہم تینا خن تے شیف کننگ نا سبخ ایتک۔