اسلام آباد۔ 07جولائی (اے پی پی) سینیٹر ڈاکٹر ثانیہ نشتر، وزیراعظم نا خصوصی کمکار راجی رکھ و تخفیف نیزگاری نیویارک اٹی اقوام متحدہ نا بڑزکو کہولی پولیٹیکل فورم پائیدار شونداری آن تران کرے۔ ٹاؤن ہال وڑاٹ اڈ ہلوک آ پولیٹیکل فورم اٹی 43ملک آک بشخ ہلنگ ءُ۔ فورم اقوام متحدہ نا زرگزرانی و راجی کونسل نا کنڈآن پاکستان نا کماشی ٹی اڈ ہلک۔ اقوام متحدہ ٹی پاکستان نا سفیر منیر اکرم دیوان نا بناءِ کرے۔ تینا تران اٹی ڈاکٹر ثانیہ کورونا دین انا رداٹ حکومت پاکستان نا کڑد و لائحہ عمل ءِ پیش کرے۔ اوپارے کہ کورونا دین انا رداٹ احساس ایمرجنسی کیش انا بشخنگ پورو وڑاٹ ڈیجیٹل نظام آ تالان ئس و راجی رکھ و انسانی وسیلہ غاتا شونداری کورونا غان مست ہم حکومت پاکستان نا اولیت آتے ٹی اوار ئس۔ راجی رکھ انا اعتبار اٹ حکومت پاکستان نا گام گیج و اونا اثرآتے مون آ تخسا ڈاکٹر ثانیہ نا پاننگ ئس کہ فائدہ ہرفوک آ آبادی نا کچ آن احساس ایمرجنسی کیش دنیا نا مسٹ میکو بھلا پروگرام گوندنگانے۔ پاکستان نا نمائندگی ءِ کرسا ڈاکٹر ثانیہ نشتر نا مستی پاننگ ئس کہ راجی رکھ انا دا ملک گیر ہلہلہ ئی پروگرام نا توسط اٹ نن مسہ اہم ءُ سبخ ہیل کرینن۔ اول، راجی رکھ انا پروگرام تے شفاف کننگ کن راستکی تیا مبنی ڈیٹا و فراوانی نا پوسکن آ نظام،ارٹ میکو، مالیاتی و ڈیجیٹل آگاہی نا کمک اٹ راجی رکھ اٹ مالیاتی و ڈیجیٹل اوار مننگ ءِ پک کننگ۔ مسٹ میکو، دین انا رداٹ انسانی وسیلہ غاتا پبی رکھ تانکہ ہلہلہ ئی حالیت آتے ٹی منفی رجحان آتے توننگ مرے۔ داکان پد ڈاکٹر ثانیہ نیویارک اٹی اقوام متحدہ نا جہانی مراسلہ نگار و نامہ نگارآتے کورونا دین انا پژدر اٹ احساس آ سرجم حوال ہم تس۔ سوج آتا ورندی ءِ ترسا اوپارے کہ پاکستان ہمو اولیکو منہ ملک آتے ٹی اوار ءِ ہرافک کورونا دین اتون مون تننگ کن گچین و پبی گام گیج کریر۔ احساس نا رداٹ جان جوڑی، تعلیم و زرگزرانی شونداری نا بابت کروک آ گام گیج آک ہم گپ وتران اٹی اوار ئسر۔ ڈاکٹر ثانیہ مسہ دے ئی دورہ غا نیویارک اٹی ساڑی ءِ۔ او دورہ ٹی اقوام متحدہ نا ایلو کیہی ذیلی میٹنگ آتے ٹی ہم بشخ ہلیک۔
