نیویارک۔ 07جولائی (اے پی پی) اقوام متحدہ ٹی پاکستان نا مندوب منیر اکرم پارینے کہ پاکستان اوغانستان آن امریکی فوج انا پیش تمنگ نا پورو مننگ نا رداٹ جھیڑہ غاتا سیاسی ایسری ءِ مون آ دننگ کن اوغان کڑدہ یعنی اوغان حکومت و طالبان تا نیام اٹ امن ہیت وگپ ءِ دُوارہ بناکننگ کن متاماری کننگ ءِ۔ پاکستانی مندوب داہیت انا درشانی ءِ سے شنبے نا دے آ اقوام متحدہ نا اقتصادی و راجی کونسل (ای سی او ایس او سی) نا صدر نا حیثیت اٹ جاری بڑزکو کہول انا پولیٹیکل فورم (ایچ ایل پی ایف) اٹی اوغانستان نا خراب مروک حالیت آتیا اقوام متحدہ نا نمائندہ غاتے حوال اٹی اسہ سوج اسے نا ورندی ءِ ترسا کرے۔ اوفورم ءِ باور کرفے کہ پاکستان اوغانستان اٹی بھلو وخت اسے آن برجاجنگ ءِ چٹفنگ و امن نا مون آ دننگ کن اول امریکہ و طالبان تا نیام اٹ دوحہ ٹی و ولدا اوغان حکومت و طالبان تا نیام اٹ تصفیہ ءِ مون آ دننگ نا کوشست آتے ٹی کمک کرے۔ اوپارے کہ دوحہ عمل کستویسس۔ گڑاس جھیڑہ غاتیان پد دا اسہ وڑاسے نا معطلی ٹی ہناسس، ہراتم جوبائیڈن انتظامیہ بیدس شڑت آن تینا فوجی تے اوغانستان آن کشنگ نا فیصلہ ءِ کرے۔ اوپارے کہ ہمیشہ داخیال کننگاکہ کہ امریکہ نا پیش تمنگ اسہ امن معاہدہ سے نا ارتقاء تون منسلک مریک و داکہ امن نا تصفیہ نا کنڈآ پیش رفت اٹ دانا تعین مریک۔ اسہ وار ہراتم دزکشی نا فیصلہ ءِ کننگاو پیش تمنگ نا گڈیکو تاریخ نا پڑو ءِ کننگا تو، داڑآن ہچ ءُ ارتباط اس متو و داپیش رفت سمجھوتہ اسکان سرمننگ نا کوشست کننگ کن بریبری نا ہڑتوم آ کنڈآتے بشخا۔ پاکستانی مندوب پارے کہ ننے وڑاسے نا بست وبند اس پٹنگ نا گرج ءِ، ایلو دروشم اٹ، ہموڑے خانہ جنگی مریک، دُن کہ مہالو ئس۔ داسہ سوج دادے کہ نن اوفتے امر یکجاکینہ۔ پاکستان ہڑتوم آ جماعت آتے یکجا کننگ کن، کمک کننگ نا کوشست آتے ٹی بھاز متاماری کننگ ءِ۔ اوطالبان تا امن ڈٹ انا بارواٹ اسہ رپورٹ اسے نا حوالہ ءِ تس ہرادے اوغان حکومت ءِ پیش کروئی ءِ، اونا پاننگ ئس کہ اودے اومیت ءِ کہ دااسہ جوان ءُ سلاہ سے ہراڑآ مذاکرات مون آ ہِننگ کیک۔
