اسلام آباد۔ 06جولائی (اے پی پی) بلوچستان حکومت نا ترجمان لیاقت شاہوانی پارینے کہ سندھ انا کنڈآن بلوچستان نا دیر آ ڈاکہ خلسا کننگا تو او حب ڈیم آن کراچی ءِ دیر انا فراوانی ءِ توریرہ۔ سے شنبے نادے آ بلوچستان ہاؤس اسلام آباد اٹی پریس کانفرنس آن تران کرسا اوپارے کہ بلوچستان حکومت تدوک آ مسہ سال اٹی بھلو بھلو پروجیکٹ آتا بناءِ کرینے۔ بلوچستان نا تاریخ نا اولیکو کینسر ہسپتال، میڈیکل ایمرجنسی رسپانس سینٹر، پوسکن آ اسکول آتا تفنگ، اسکول آتا اپ گریڈیشن، صوبہ ٹی گڈ گورننس تون اوار احتساب ءِ پک کننگانے، بنجاناچکار آن ہمو بلوچستان ہرادے مستین اٹ گوجالسا مرسا کننگا او داسہ گوجالنگپک و شونداری نا کنڈآ کاہک۔ اسہ کنڈآ مستین نا حکومت آتیان چپ بنجانا کنڈآن بلوچستان ءِ مون آ دننگ آ چکار کننگ انگ ءِ ایلو کنڈآ اسہ ویل اس ہرا بلوچستان ءِ مون تروک ءِ او بنجاغان آخا سندھ حکومت آن ءِ۔ سندھ حکومت بلوچستان نا زرخیز ڈغار ءِ بنجرکننگ اٹ لگوک ءِ۔ اوپارے کہ ارسا نا دیر بلوچستان ءِ سندھ انا کمک اٹ ملک، 1991ٹی ارسا معاہدہ مس، تدوک آ بیست سال اٹی سندھ حکومت وخت اس ہم ننا بشخ ءِ پورو تتنے، داوخت آ سندھ پنجاب آن 17درسد دیر انا کمتی نا غاو کننگ ءِ ولے مون آ بلوچستان ءِ سندھ حکومت 42درسد شارٹ فال آ دیر فراوان کننگ ءِ،۔ بلوچستان نا ارسا ٹی دیر انا شیئر10ہزار 9سد کیوسک ءِ، ولے بلوچستان ءِ داوخت آ سندھ آن بیرہ 7ہزار کیوسک دیر ملنگ ءِ۔ ہراٹی 5سد کیوسک کچی کینال آن وخت اس کہ 4ہزار 583کیوسک پٹ فیڈر آن ملنگ ءِ۔ اوپارے کہ تدوک آ اِراتُواٹی بلوچستان نا دیر انا بابت 42درسد حق ءِ خلنگا۔ ارسا معاہدہ نا رداٹ دیر انا کمتی آن پد ہم سندھ کے پی کے و بلوچستان ءِ پورو دیر فراوان کننگ نا پابند ءِ۔ دامعاہدہ ٹی نوشتہ ءِ کہ شارٹ فال اسے آن کے پی کے و بلوچستان مستثنیٰ ءُ۔ ولے دا باندات آ داوخت آ سندھ حکومت انکاری ءِ۔ اوپارے کہ ہراتم بلوچستان حکومت دیر انا کمتی نا باندات آ وزیراعلیٰ سندھ مراد علی شاہ تون غاو کرے تو اوپیدوار انکار کرسا پارے کہ او بلوچستان ءِ پورو دیر فراوان کپک۔ دیر انا کمتی آن بلوچستان نا بزغر آتے داسال 75آن 77ارب روپئی نا مالی نسخان مننگ ءِ۔ دانسخان سندھ حکومت نا ہٹ دھرمی آن مننگ ءِ۔ 1991نا ارسا معاہدہ غان پد آن داتم اسکان دیر انا کمتی نا سوب آن بلوچستان ءِ جم وڑاٹ 27سد آن 28 سد ارب روپئی نا نسخان مسنے ہرانا زموار سندھ حکومت ءِ۔ اوپارے کہ نن چندی فورم تیا سندھ حکومت تون ویل ءِ ہرفین۔ ننا محکمہ انہار دا معاملہ غا ہراتم سندھ حکومت تون رابطہ کننگ نا کوشست کیک تو اونا کال آتے خف توننگپک۔ اوواپڈاغان خواست کرے کہ او دا باندات اٹ نیام تمسا دانا ایسر اس کننگ اٹ تینا کڑد ءِ ادا کے۔ بلوچستان نا بشخ ءِ اودے تننگے۔ لیاقت شاہوانی نا مستی پاننگ ئس کہ تونسہ بیراج آن بلوچستان ءِ ہر سال 5 سد کیوسک دیر ملک ہراہرسال پورو تننگک ہراڑآن ننے وخت اس ہم غاو متنے وخت اس کہ ایلو کنڈآ سندھ حکومت محکومیت و جمہوریت و بلوچستان ءِ تینا سسٹر پروانس مننگ نا دعویٰ کیک ولے تدوک آ بیست سال آن ننا دیر انا حق آ ڈاکہ خلنگ انگ ءِ اگہ اونا دارویہ برجاسلیس تو حب ڈیم آن ہرادیر کراچی آ کاہک تو بحالت بیوسی نن اونا دیر ءِ تورنہ۔ اوپارے کہ بلوچستان نا نصیر آباد ڈویژن اٹ کشارگری تو اسہ کنڈآ مخلوق ءِ کنوئی ءُ دیر اف مخلوق ہموڑے برانز کننگ ءِ۔ سندھ انا زمیندار آک غیر کانودی پمپ خلسا تینا فصل آتے کن دیر دننگ ءُ۔ اوپارے کہ نن اومیت کینہ کہ ارسا معاہدہ نا رداٹ ہرادیر آ بلوچستان نا حق ءِ او دے حکومت سندھ ننے فراوان کیک۔
