اسلام آباد۔ 06جولائی (اے پی پی) بنجائی وزیر تعلیم و کسبی تربیت شفقت محمود پارینے کہ انٹربورڈ کمیٹی آف چیئرمینز آئی بی سی سی نا سرٹیفکیٹ ایکولینس کن جوڑ کروک آ ای پورٹل آن طالب علم آتے تینا تعلیمی سند آتا ایکولینس اٹ آسانی مریک و وخت بچک۔ سے شنبے نادے آ اووزارت تعلیم اٹی آئی بی سی سی ای پورٹل نا بناءِ کرے۔ داوخت آ پارلیمانی سیکرٹری تعلیم وجیہہ قمر، سیکرٹری تعلیم و سیکرٹری آبی بی سی سی غلام علی ملاح ئسک ہم ساڑی ئسر۔ داوخت آ بنجائی وزیر تعلیم شفقت محمود تینا تران اٹی آئی بی سی سی ءِ ای پورٹل نا بناءِ کننگ آ مبارکبادی تس۔ اوپارے کہ داپورٹل آن طالب علم آتے تینا نہادی تعلیمی سند آتے رکھ کننگ کن ایکولینس دوئی کننگ اٹ کمک رسینگک و اودانا ٹریکنگ ءِ ہم کننگ کیرہ۔ اوپارے کہ ای پورٹل آ آن لائن فیس جمع کرفنگ نا ہم آسراتی دوئی ءِ و طالب علم آتے بینک آتے ٹی چِراٹ سلنگ نا گرج مفک۔ بنجائی وزیر پارے کہ آئی بی سی سی نا ایکولینس نا متکن آ نظام ہم کاریم کرسا کیک انتئے کہ ہراعلاقہ غاتے ٹی آن لائن نا آسراتی دوئی اف او آئی بی سی سی نا دفترآتیا ہنسا تینا سند آتا ایکولینس ءِ دوئی کننگ کیرہ۔ شفقت محمود پارے کہ ملک اٹ کم و ود 30انا خڑک تعلیمی بورڈ کاریم کننگ ءُ۔ داکان بیدس کیمبرج و ایلو جہانی بورڈآک ہم اریر۔ داغٹ سلابت اٹ داسسٹم ءِ تیار کننگانے۔ داٹی طالب علم آتا نہادی سند آتا گم مننگ نا خطرہ مفک و رکھوک مریرہ۔
