لاہور۔ 06جولائی (اے پی پی) گورنر پنجاب چوہدری محمد سرور پارینے کہ پاکستان تحریک انصاف نا حکومت عدلیہ تون اوار غٹ ادارہ غاتا سوگوی ءِ پک کننگ کن گام گیج آتے پک کننگ ءِ، انصاف نا فراوانی ٹی بروک آ اڑاند آتے مر کننگ کن ہم عدلیہ تون پورو کمک کننگک، اوگورنر ہاؤس لاہور اٹی پوسکن آ چیف جسٹس لاہور ہائی کورٹ محمد امیر بھٹی نا سوغندی دود اٹی میڈیا تون گپ وتران کریکہ۔ گورنر پنجاب پارے کہ وزیراعظم عمران خان نا کماشی ٹی حکومت نا مشن الس ءِ انصاف تون اوار غٹ بنداوی آسراتی تا فراوانی ءِ، راج اسے نا شونداری و سوگوی کن اڑزآن و فری انصاف فراوان کننگ المی مریک، اومیتءِ کہ پوسکن آ چیف جسٹس لاہور نا کماشی ٹی عدلیہ پنجاب نا مخلوق ءِ انصاف نا فراوانی ءِ پک کننگ کن پبی کاریم کیک۔ اوپارے کہ ہراتم غٹ ادارہ غاک انصاف نا فراوانی کن اواری اٹ کاریم کیرہ تو یقینی وڑاٹ الس ءِ دمدستی انصاف ملک۔ گورنر محمد امیر بھٹی ءِ پوسکن آ چیف جسٹس نا زمواری تے سنبھالنگ آ مبارکبادی تس۔ داکان مست گورنر پنجاب چوہدری محمد سرور لاہورہائی کورٹ نا پوسکن آ چیف جسٹس محمد امیر بھٹی آن سوغند ہلک۔ دوداٹی وزیراعلیٰ پنجاب سردار عثمان بزدار، کورو کمانڈر لاہور لیفٹیننٹ جنرل محمد عبدالعزیز، نیول اسٹیش کمانڈر عامر اقبال خان، ڈپٹی اسپیکر پنجاب اسمبلی سردار دوست محمد مزاری، ایڈووکیٹ جنرل پنجاب احمد اویس، صوبائی وزیر میاں محمود الرشید، سردار محسن خان لغاری، راجہ محمد بشارت، چیف سیکرٹری پنجاب جواد رفیق ملک، آئی جی پنجاب انعام غنی، زالبول محتسب پنجاب نبیلا حاکم علی، سینئر باسک بورڈ آف ریونیو بابر حیات تارڑ، پرنسپل سیکرٹری ٹو گورنر پنجاب ڈاکٹر راشد منصور، خصوصی کمکار وزیراعلیٰ پنجاب ڈاکٹر فردوس عاشق اعوان اس تتون اوار ایلوفک ہم ساڑی ئسر۔
