بھلا درآمدی منڈی تے کروک آ برآمدآتے ٹی خاطر خواہ ودکی مسنے، وزیراعظم نا سلاہکار واپار و زرکاری عبدالرزاق داؤد نا ٹویٹ

اسلام آباد۔ 06جولائی (اے پی پی) وزیراعظم نا سلاہکار واپار و زرکاری عبدالرزاق داؤد پارینے کہ بھلا درآمدی منڈی تے کروک آ برآمد آتے ٹی خاطرخواہ ودکی مسنے۔ سے شنبے نادے آ تینا ٹویٹ اٹی اوپارے کہ تدوک آ مالی سال 2021ء ٹی چین ءِ کروک آ برآمدآک 34درسد ودکی اٹ 2.33ارب ڈالر اسکان ودار وخت اس کہ مالی سال 2020ء ٹی چین ءِ 1.74ارب ڈالر نا برآمدات کننگاسس۔ ہنداوڑ تدوک آ مالی سال اٹی چین ءِ کروک آ برآمد آتے ٹی 586ملین ڈالر نا ودکی مسنے۔ اومستی پارے کہ جرمنی ءِ کروک آ قومی برآمد آک 19درسد ودکی اٹ 1.3ارب ڈالر نا مقابلہ ٹی 1.5ارب ڈالر اسکان ودانو۔ ہنداوڑ ہالینڈ ءِ کروک آ برآمد آک ہم تدوک آ مالی سال اٹی 23درسد ودکی اٹ اسہ ارب ڈالر نا مقابلہ ٹی 1.2ارب ڈالر اسکان سرمسر۔ سلاہکار واپار پارے کہ مالی سال 2020-21ء ٹی پولینڈ ءِ کروک آ قومی برآمد آک 28درسد ودکی اٹ 308ملین ڈالر اسکان ودار وخت اس کہ مالی سال 2019-20ء ٹی 241ملین ڈالر نا برآمد کننگانے۔ اوپارے کہ کوویڈ۔ 19نا دین انا ویل آتیان پدہم ننا برآمد آتے ٹی خاطر خواہ ودکی مسنے ہراستاکڑزک۔ اوچندی ملک آتے ٹی تعینات وزارت واپار نا ٹریڈ اینڈ انویسٹمنٹ آفیسر آتا کوشست آتا ستاءِ کرسا پارت کرینے کہ برآمد آتا مون آ دننگ کن برآمد کنندگان آتے ہروڑنا ممکنہ آسراتی تیٹی پین ودکی ءِ پک کننگے۔