اسلام آباد۔5جولائی (اے پی پی): وزیر ءِ تہی کار شیخ رشید احمد ءَ گوشت کہ اگاں مشکلیں وھد ءِ اتک گڈا پاکستان ءِ اُرد، حکومت، اپوزیشن ءَ ھوار سرجمیں راج ھمگام ءُ یک مشت بیت، مئے جاور آں گوں گر ءُ چیل بوھگ ءِ واستہ سرجمیں تیاری انت، جاور ھال آنی سر ءَ سرجمیں رنگ ءَ چار ءُ بچار بوھگ ءَ انت، مزن وزیر عمران خان ء، حکومت ءِ واھشت انت کہ اوگانستان یا دوحہ ءَ توامیں اوگان سروک ءُ مستر آنی گوما بہ نند آں ءُ جاور ھال آنی ھرچی گیواری ءِ در گیجگ بہ بیت مارا قبول انت، بھارتی چیر اندریں ایجنسی را ءُ ایشی ءِ جھلی ادارگ پاکستان ءَ ناشرکاری کنگ ءَ انت۔ کراچی ءَ ھم یک گروپ ءِ گرگ بوتگ ایشی ءِ جار یک جوانیں موہے ءَ جنگ بیت، اوگانستان ءَ گوں نزیکیں دمگ 7 سیم سرئی دمگ آنی تہ ءَ روگ ءُ آیگ ءَ را وھد ءِ لوٹانی رد ءَ جوڑ کناں۔ اے ھیالانی درشانی آءی ءَ دو شمبے ءَ وزارت ءِ تہی کار ءَ دیوان ءَ چہ پد پریس کانفرنس ءَ گوں گشتانک دیان ءَ کت۔ وزیر ءِ تہی کار ءَ گوشت کہ من ءَ امیت انت کہ اوگانستان ءَ اے رند ءَ آ جاور نہ بنت ھما کہ پیسریگیں زمانگ ءَ بوتگ انت۔ آئی ءَ گوشت کہ نادرا چیئرمین ءَ را پنت ءُ شون کتگ کہ سرجمیں پاکستان ءَ را نادرا ءِ کارگس آنی اندر ءَ ھرچی گند است اِنت ایشاناں ساپ کنگ بہ بیت۔ کراچی ءَ پیسر ءَ چہ 30 انچیں مردم آنی ھلاپ ءَ کاروائی کنگ بوتگ ھماواں کہ دروگیں شناسی کاٹ جوڑ کتگ۔
