گوادر۔ 05جولائی (اے پی پی) وزیراعظم (اینودوشنبے نادے)آ گوادر نا دورہ ٹی 2200ایکڑ آ تالان گوادر پورٹ فری زون فیز ٹو انا بنداو ءِ تخک و سویلی بلوچستان کن 600ارب روپئی نا شونداری پیکج آ عملدرآمد نا بابت پیش رفت نا ہم جاچ ءِ ہلیک۔ داہیت ءِ چیئرمین سی پیک اتھارٹی لیفٹیننٹ جنرل (ر) عاصم سلیم باجوہ وزیراعظم نا دورہ نا بابت گپ وتران کرسا پارے۔ اوپارے کہ اینو وزیراعظم گوادر آ بننگ ءِ ہرا اسہ تاریخی ءُ موقع اسے۔ وزیراعظم نا دورہ ٹی گوادر پورٹ فیزون نا پوروی آن پد گوادر فری زون فیز ٹو انا بنداو ءِ تخنگک۔ دااسہ بھاز بھلو گام اسے۔ فری زون نا فیزون بیرہ 60ایکڑ آ تالان ئس وخت اس کہ فیز ٹو 2200ایکڑ آ تالان مریک۔ اوپارے کہ وزیراعظم نا دورہ ٹی پنچ فیکٹر ی تا تفنگ نا بنداو ءِ ہم تخک۔ گوادر شار و سویلی بلوچستان کن وزیراعظم 600ارب روپئی نا پیکج اس تسنے۔ اوپارے کہ اینو دود اٹی شنگھائی آن 7,8بھلا زرکارآک آن لائن بشخ ہلیرہ و نئے بیرہ گوادر بلکن مچ آ پاکستان اٹ زرکاری نا ڈٹ آتا پڑو ءِ کیک۔ 7علاقائی ملک آتا سفیرآک وزیراعظم نا ساڑی گری ٹی تیناتینا ملک آتا کنڈآن زرکاری ٹی بشخ ہلنگ نا بابت گپ وتران کیرہ۔ اوپارے کہ چائنا بزنس سینٹر فری زون ون اٹی واقع ءِ دادے ساؤتھ زون ہم پاننگک۔ داٹی 46انٹرپرائززرجسٹر مسنو ہرافتے ٹی 12فیکٹری اوار ءُ ہرافتیان مسٹ پورو مسنو و اوفتا پیدوار برجاءِ۔ اوپارے کہ داڑے ٹریفک دے پہ دے آ ودنگ ءِ۔ تدوک آ سال مست انا مقابلہ ٹی گڑاتا سد آ ہنداخہ زیات فراوانی مسنے و داسال نن 60ہزار میٹرک ٹن اسکان سرمسونن۔ 5ایل پی جی نا جہاز گوادر آ بسنو۔ بروک آ دے تے ٹی ٹریفک اٹ پین ودکی مریک۔ فری زون اٹی صنعت سازی کن است خواہی ٹی ودکی مسنے۔ ٹراسشپمنٹ اٹ ہم است خواہی ودسا ہِننگ ءِ۔ اوپارے کہ ایران تون گبدنا کراسنگ پوائنٹ چلینگ نا بناءِ کرینے۔ گوادر نا کمک اٹ ایرانی گڑاتا ات و در آ کاریم مننگ ءِ۔ ایرانی سیم اتون باڑ خلنگ نا کاریم ہم ترندی اٹ برجاءِ۔ بارڈر مارکیٹ ہم جوڑ مننگ ءِ ہراڑآن واپاری کچ اٹی پین ودکی مریک و اسمگلنگ اٹ ہم کمتی بننگ ءِ۔ وزیراعظم نا بجلی و دیر نا ڈٹ آتا بابت بھاز زیات است خواہی ءِ۔ لیفٹیننٹ جنرل (ر) عاصم سلیم باجوہ پارے کہ وزیراعظم نا دورہ ٹی اسہ معاہدہ سے آ دستخط مریک ہرانا رداٹ ننے 1.2ملین گیلن نا ساف دیر انا پلانٹ نا ٹیکی اس ایتک۔ دا12آن 13تُواٹی پورو مریک۔ داکان بیدس سویلی بلوچستان پیکج اٹ گوادر کن دیر و بجلی نا ڈٹ آک اوار ءُ۔ 5ملین گیلن دیر ہڑدے ئی ساف دیر انا فراوانی نا پلانٹ ہم داپیکج اٹ اوار ءِ۔ داکان بیدس وزیراعظم بجلی نا اسہ ڈٹ اسے نا منظوری ءِ تسنے ہراڑآ کاریم بناکرینے۔ ہرانا رداٹ سویلی بلوچستان خاص کر گوادر ءِ مین گریڈ اتون اوار کننگک۔ داکان بیدس 300میگاواٹ نا اسہ پلانٹ اسے آہم کاریم مننگ ءِ۔ بجلی دیر و شار اکن ایلو آسراتی تیا وزیراعظم نا خاص چکار ءِ۔ وزیراعظم ءِ سویلی بلوچستان نا شونداری پیکج نا بابت حوال ہم تننگک۔ وزیراعظم داڑآ مروک آ پیش رفت نا ہم جاچ ءِ ہلیک۔
