اسلام آباد۔ 05جولائی (اے پی پی) وزیر داخلہ شیخ رشید احمد پارینے کہ ازبکستان عظیم اسلامی میرات نا امین ءُ ملک اسے، پاکستان و ازبکستان نا نیام اٹ قدیم مذہبی و دودوربیدگی تعلقداری ءِ، داخیال آتا درشانی ءِ او ازبکستان نا سفیر اویبک عارف عثمانوف تون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی پاکستان و ازبکستان ہڑتوم آ کنڈآتا تعلقداری ءِ مون آ دننگ تون اوار تین پہ تینی است خواہی نا باندات آ گپ وتران مس۔ اوڑدہی ٹی پاکستان و ازبکستان نا نیام اٹ ویزا معاہدہ غاتیا پیش رفت نا جاچ ءِ ہلنگا و ہڑتوم آ ملک آتا نیام اٹ واپار و سیل و سوات ءِ مون آ دننگ آ گپ وتران کننگا۔ داوخت آ ہڑتوم آ ملک آتا نیام اٹ کانود نافذ کروک آ ادارہ غاتا نیام اٹ رابطہ غاتے ودفنگ آ امنا کریر۔ اوڑدہی ٹی وزیر داخلہ پارے کہ پاکستان و ازبکستان نا نیام اٹ قدیم مذہبی و دودوربیدگی تعلقداری ءِ۔ ازبکستان عظیم ءُ اسلامی میرات اسے نا امین ءُ ملک اسے۔ اوپارے کہ اسلامی رشتہ ٹی تفوک ہڑتوم آ ملک آتا نیام اٹ رابطہ غاتے پین سوگو کننگ نا گرج ءِ۔ پاکستان ازبکستان نا شاری تیکن ویزاٹی خصوصی آسراتی تسنے۔ ازبک شاری تے پاکستان آ بننگ کن داسہ 5دے انا ٹرانزٹ ویزاہم جاری کننگک۔ داوخت آ ازبک سفیر پارے کہ لاہور و تاشقند نا نیام اٹ پی آئی اے نا جہاز 2جولائی آن بحال مسنے۔ ہوائی سفر نا آسراتی آن ہڑتوم آ ملک آتا نیام اٹ سیل و سوات و کاروبار ءِ مون آ دننگک۔ اوپارے کہ ویزہ آسراتی نا معاہدہ غا عملدرآمد آن رابطہ غاتے ٹی پین ودکی مریک۔
