اسلام آباد۔ 05جولائی (اے پی پی) وزیرخارجہ مخدوم شاہ محمود قریشی پارینے کہ بھارت نا ٹیررفنانسنگ نا باندات ءِ جہانی کہول آ ہرفنہ۔ دوشنبے نادے آ بھارت سرکار نا منفی عزم و علاقائی سلامتی ءِ مون تروک خطرہ غاتا بابت اسہ بیان اسے ٹی وزیرخارجہ پارے کہ بھارت نا مقبوضہ کشمیر پالیسی بھاز بے وڑ بے سہب مس، کشمیری سرکڑدہ، بھارت سرکارآن بدبیسہ خننگ انگ ءُ۔ کشمیری راہشونک وزیراعظم مودی اتون مروک آ ساڑی آ اوڑدہی ٹی 5اگست 2019ء نا اسہ کنڈی و غیر آئینی گام گیج آتیا نظرثانی نا خواست کرینے۔ شاہ محمود قریشی پارے کہ بھارت نا ٹیررفنانسنگ نا باندات ءِ جہانی کہول آ ہرفنہ۔ داکان مست ہم بھارت نا دہشت گردی نا پیدوار شاہدی ڈوزیئرنا دروشم اٹ اقوام متحدہ و جہانی برادری نا مون آ پیش کرینن۔ اوپارے کہ دنیا دہشت گردی نا مالی کمکاری ءِ ماس کش کننگ خواہک۔ اوپارے کہ جوہر ٹاؤن لاہور اٹی مروک آ دہشت گردی نا واقعہ نا جاست وپاست اٹ، مون آ بروک آ پبی شاہدی تا بنداو آ داسہ پاکستان دااومیت کننگ ءِ کہ دنیا بھارت نا دا ٹیررفنانسنگ نا نوٹس ءِ ہلیک۔ نن دہشت گردی نا توننگ و تینا سیم تا رکھ اکن ہرممکن گام گیج کننگ اُن۔ شاہ محمود قریشی پارے کہ نن سیم آ باڑ خلکونن۔ نن تیناقبائلی علاقہ غاتے دہشت گرد آتیان پاک کرینن، نن ہموڑے شونداری کاریم تا بناءِ کرینن۔ اوغان باہوٹ آتا بابت وزیر خارجہ پارے کہ نن اوغان باہوٹ آتا شرفمندی اٹ وطن آ پدی ہِننگ نا خواہندار اُن، دامسخت کن ننے جہانی برادری نا کمک درکار مریک، اوغان باہوٹ آتا وطن آ پدی ہِننگ کن، اسہ مقرر ءُ مد و جامعیت نا حامل، وافر وسیلہ والا ڈٹ بایدے ٹہیفنگے و اودے بایدے اوغان امن عمل نا بشخ جوڑ کننگے۔ اوپارے کہ اگہ نن تینا شار و شاری تے رکھ کننگ خوانہ تو ننے دا بابت سنجیدی اٹ سجفوئی مریک۔ وزیرخارجہ پارے کہ اگہ اوغانستان اٹ دامنفی سوچ اٹ بدامنی تالان کرسا کننگا کہ پاکستان ”ٹوفرنٹ“ (اِراسیم تا بے چیٹی نا) حالیت آتے اختہ مرے تو دا جہانی مسخت آتیان چپ مریک،دنیا داحالیت آتا بایدے نوٹس ءِ ہلے۔
