اسلام آباد۔ 05جولائی (اے پی پی) بنجائی وزیر توانائی حماد اظہر پارینے کہ ملک اٹی مسابقتی عمل نا کمک اٹ تیل وگیس انا پٹنگ کن پوسکن ءُ بلاکس تننگ انگ ءِ، اسہ سال اٹی گردشی وام تا بہاؤ538آن کم کرسا 177 ارب آ ایسونن۔ داخیال آتا درشانی ءِ او جاپانی سفیر تون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی توانائی نا بشخ اٹی ہڑتوم آ کنڈآتا کمکاری آ گپ وتران کننگا۔ وزیر توانائی حماد اظہر پارے کہ ملک اٹ مسابقتی عمل نا کمک اٹ تیل و گیس انا پٹنگ کن پوسکن ءُ بلاک تننگ انگ ءِ، پوسکن آ بلاک آتا نیلامی آن ملک اٹ تیل و گیس انا سرجزآتے ٹی ودکی مریک۔ اوپارے کہ جاپانی کمپنیک تیل و گیس انا بلاک آتا نیلامی ٹی بشخ ہلیر۔ حکومتی گام گیج آن ہندی تیل و گیس انا پیدوار اٹی ودکی و درآمدی بل ءِ کم کننگ اٹ کمک رسینگک۔ حماد اظہر جاپانی سفیر ءِ گردشی وام تے ٹی کمتی نا گام گیج آتیا حوال ترساپارے کہ اسہ سال اٹی گردشی وام تا بہاؤءِ 538آن کم کرسا 177 ارب آ ایسونن۔ حکومتی گام گیج آن زرکارآتا است بڈی مسنے۔ صنعتی صارف آتے کن پیکج آن بجلی کھپت اٹ 15 درسد ودکی مسنے۔ وزیر توانائی جاپانی کمپنی تے بجلی نا فراوانی و بشخنگ اٹ زرکاری نا سلہ خلک و وزیر توانائی نا بلوچستان تون اوار مرمر انگا علاقہ غاتے ٹی آف گریڈ سلوشن کن تکنیکی سٹڈیز کن جاپانی کمکاری نا ہم خواست کرے۔ اوڑدہی ٹی جاپانی سفیر پارے کہ جاپان گیگ بدل توانائی ایل این جی سیکٹر اٹ مالی کمکاری کن انرجی ٹرانزیشن اینیشیٹیوبناکننگ ءِ۔ داگام انا رداٹ دہ ارب ڈالر نا مالی امداد تننگک۔ جاپانی سفیر حماد اظہر ءِ ایشیاگرین پارٹنر شپ منسٹیرئل میٹنگ اٹ بشخ ہلنگ نا سلہ خلک۔
