اسلام آباد۔ 05جولائی (اے پی پی) امریکہ نا کنڈآن عطیہ کروک آ ویکسین موڈرنانا 25لکھ خور آتا اسہ پین کھیپ اس اسلام آباد آ سرمسنے، کوویکس نا آسراتی نا کمک اٹ ویکسین نا بشخنگ نا وڑوڈول آتا رداٹ موڈرنا(ایم آر این اے۔ 1273)کوویڈ۔ 19ویکسین نا 2.5ملین خور آتا اسہ پین کھیپ اس اسلام آباد آ سرمس۔ وزارت جان جوڑی نا کمامدارآک پارینو کہ امریکہ نا کنڈآن عطیہ کروک آ ویکسین پاکستان اٹ قومی کہول آ فراوان کننگک و ویکسین خلنگ نا ڈٹ ءِ مون آ تخسا اولیتی گروہ تے خلنگک۔ پاکستان اٹی داتم اسکان 30لکھ بندغ ءِ پورو وڑاٹ ویکسین خلنگانے و 13.5ملین ویکسین نا اسہ خوراس خلفینو۔ اقوام متحدہ نا چناتا فنڈ(یونیسیف)نا کنڈآن جاری اسہ پریس ریلیز اسے ٹی پاننگانے کہ دین انا بنامننگ آن پد آن ملک اٹی کوویڈ۔ 19نا نہہ لکھ شست ہزار آن زیات کیس رپورٹ مس و کم از کم 22379بندغ داناجوڑی نا سوب آن زوال کرینو۔ اوپارے کہ جہانی ادارہ جان جوڑی بھاز گچین وڑاٹ ویکسین خلنگ نا مہم ءِ چلیفنگ نا حکومت پاکستان نا گام انا ستاءِ کرینے۔ پاکستان ملک اٹ دوئی کوویڈ۔ 19ویکسین ءِ بریبری نا اصول ءِ مون آ تخسا بشخانے و ہنداوڑ دا پاکستان نا ہمو مرمرانگا علاقہ غاتسکان ہم سرمسنے ہراڑے لکھ آبندغ آتے کورونا دین کون آ دین آن رکھ دوئی مسنے۔ سائنسی ایسر و چندی ملک آتا نیام اٹ یکجہتی نا سوب آن صدی نا جان جوڑی نا غٹ آن بھلا خطرہ تون مون تننگ اٹ کمک رسینگانے۔ پاکستان اٹ یونیسیف نا نمائندہ عائدہ گیرما پارے کہ یونیسیف کوویکس نا آسراتی نا کمک اٹ پاکستان ءِ ویکسین نا فراخ دلانہ عطیہ تننگ آ امریکہ حکومت نا منت واری ءِ ہرفک۔ اوپارے کہ زیات کچ اٹ ویکسین ءِ رکھ تخنگ کن سردخانہ غاتا گنجائشت اٹ ودکی کننگک و خطرہ غاتا بارواٹ آگاہی کن ابلاغ عامہ نا کمک اٹ الس اٹ شعور و آگہی ٹی ودکی کننگک۔ داڑآن ویکسین آ مخلوق نا پت اٹ ودکی مریک۔ دین انا تالانی ءِ توننگ کن دارکھی گام گیج آتیا سختی اٹ عمل کننگ بھاز المی ءِ۔ داگام گیج آتے ٹی کم از کم 20سکینڈ اسکان صابون اٹ دوتے سلنگ یا سینیٹائزر نا کاریم اٹ اتنگ ءِ اوار کیر، ماسک بینرو ایلومخلوق تون کم از کم شش فٹ مر سلر، زیات رش والا جاگہ غاتیا ہِننگ آن پاناد کیر و کوویڈ۔ 19نا نشانی پاش مننگ نا دروشم اٹ اُراٹی مریر۔ کوویکس نا آسراتی نا مسخت کٹیا نا کچ آن چپ غٹ شریک ملک آتے منظور مروک ویکسین اسکان ترند رفتار بریبری و ساف رسینگ فراوان کرسا 2021ء نا ایسر اسکان جہانی دین انا ترند ریسہ تون مون تننگ اٹ کمک کننگ ءِ۔ داآسراتی فرنٹ لائن ہیلتھ کیئر و راجی کارندہ غاتون اوار اوار ایلو زیات خطرہ غاتیان دوچار گروہ و نزور بندغ آتا رکھ ءِ ممکن کیک۔
