اسلام آباد۔ 02جولائی (اے پی پی) چیئرمین سینیٹ محمد صادق سنجرانی تون پاکستان اٹی کیوبا نا سفیر زینرجیویرجیروگونزیلز جمعہ نادے آ پارلیمنٹ ہاؤس اٹی اوڑدہی کرینے۔ سینیٹ سیکرٹریٹ آن جاری بیان نا رداٹ اوڑدہی ٹی ہڑتوم آ کنڈآتا تعلقداری، علاقائی حالیت و تین پہ تینی است خواہی نا باندات آ گپ وتران کننگا۔ چیئرمین سینیٹ صادق سنجرانی پارے کہ پاکستان کیوبا تون تعلقداری تے بھاز قدر انا نظراٹ ہرک۔ ہڑتوم آ ملک آتا نیام اٹ دہائی تیا متکن آ تعلقداری ءِ زرگزرانی و پارلیمانی کمکاری نا کمک اٹ پوسکن آ بڑزی تسکان دننگ نا گرج ءِ۔ چیئرمین سینیٹ محمد صادق سنجرانی جان جوڑی و تعلیم نا بشخ اٹی کیوبا نا کمکاری نا ستاءِ کرے۔ اوپارے کہ ہڑتوم آ ملک آتا نیام اٹ تین پہ تینی کمکاری ءِ پین مون آ دننگ کن پین وارخواہی پٹنگ نا گرج ءِ۔ چیئرمین سینیٹ پاکستانی میڈیکلطالب علم آتے کن کیوبا نااسکالرشپ پروگرام نا ستاءِ کرے۔ اوپاکستان اٹ قدرتی آفت خاص وڑاٹ 2005ء نا زمی جمب آن مروک آ بھسکاری آن پد کیوبانا طبی امدادنا ہم ستاءِ کرے۔ داوخت آ کیوبا نا سفیر زینرجیویرکیروگونزیلز پارے کہ کیوباہم پاکستان تون تیناتعلقداری تے بھاز اہمیت ایتک۔ فریق آک الس تون الس نا رابطہ و زرگزرانی کمکاری ءِ پین سوگو کننگ نا گرج آ زور شاغار۔ چیئرمین سینیٹ پارے کہ ہڑتوم آ ملک آتے پارلیمان نا کمک اٹ ہڑتوم آ کنڈآتا تعلقداری تے پین سوگو کننگ نا گرج ءِ، کیوبا پاکستان اٹ زرگزرانی و انسانی وسیلہ غاتالائخی آن فائدہ ہرفنگ نا خواہندار ءِ۔ کیوبن سفیر پارے کہ پارلیمانی رابطہ غاتے پین سوگو کننگ کن کیوبا نا قومی اسمبلی ٹی فرینڈ شپ پڑک اس ہم جوڑ کننگانے۔ چیئرمین سینیٹ پارے کہ پاکستان اٹ زرکاری کن چاگڑد بھاز سازگار ءِ، زرکار دوست پالیسی تیان کیوبا ہم بایدے فائدہ ہرفے، کیوبا کن توانائی، واپار، کشت وکشار و فشری بشخ آتے ٹی زرکاری نا وارخواہی ساڑی ءِ۔ اوپارے کہ پاکستان واپار، جان جوڑی و دودوربیدگ نا بشخ آتے ٹی کیوباتون تعلقداری تے پین مون آ دننگ نا خواہندار ءِ۔ کیوبن سفیر پارے کہ کیوبا نا بزنس مین پاکستان اٹ زرکاری نا خواہندار ءُ۔ صادق سنجرانی پارے پاکستان ڈیہہ ٹی امن و سوگوی ءِ مون آ دننگ کن سنبرینگوک ءِ۔ چیئرمین سینیٹ کیوبا نا کنڈآن پاکستان کن سفیر مننگ آ مبارکبادی پیش کرے۔ چیئرمین سینیٹ دااومیت نا درشانی ءِ کرے کہ کیوبا ناسفیر ناپاکستان اٹی ساڑی گری آن ہڑتوم آ ملک آتا تعلقداریک پین سوگو مریرہ۔ چیئرمین سینیٹ کیوبا ٹی کورونا دین آن مروک آ مرک آتیا است ہسونی نا درشانی ءِ کرے۔ اوپارے کہ کیوبا کورونا دین انا توننگ کن گچین گام گیج کرے و اومیت ءِ زوت کیوبا نا حکومت دادین انا مون ءِ تورک۔ اوپارے کہ 27فروری 2017ء آ چیئرمین سینیٹ نا دورہ کیوبا ٹی پارلیمانی امور ءِ سوگو کننگ کن مفاہمتییات داشت آ دستخط کننگا۔ اوپارے کہ مفاہمتییات داشت، سینیٹ آف پاکستان و پیپلزپاور ریپبلک آف کیوبا نا نیام اٹ تعلقداری تے پین مون آ دننگ اٹ اہم کڑد ادا کیک۔
