نیویارک۔ 02جولائی (اے پی پی) اقوام متحدہ نا اقتصادی و راجی کونسل نا صدر و پاکستانی مندوب منیراکرم پارینے کہ کونسل نا پائیدار شونداری نا بڑزکو کہولی فورم (ایچ او پی ایف) نادیوان بروک آ ہفتہ غامریک ہراٹی کورونا دین آن زہمی ملک آتا 2030ء نا تروک آ ایجنڈامچ آ دنیا ٹی گچینی اتنگ کن پبی عزم و کورونا دین آن مروک آ نسخان تیان پد بحالی نا وڑوڈول آتیا سجفنگک۔ دیوان اٹی شریک دادین انا مون ءِ توننگ کن کروک آ کارروائی و گام گیج آتے ٹی پانہ و پائیدار شونداری نا ہدف آتا راہشون اصول آتا کاریم اٹ اتنگ نا بابت کورونا دین اتون مون تننگ نا وڑوڈول دادیوان نا اہم ایشومریک۔ اقتصادی و راجی کونسل نا دیوان مورخہ 6جولائی آن 15جولائی 2021ء اسکان مریک۔ داٹی فورم نا 13جولائی آن 15جولائی اسکان مروک آ وزارتی کہول آ مروک آ دیوان ہم اوار ءِ۔ دیوان نا مرکزی سرحال پائیدار شونداری و کورونا غان بحالی نا پکاعزم ہراڑآن پائیدار شونداری نا اقتصادی، راجی و چاگڑدی پلوآتے مون آ دننگے تانکہ پائیدار شونداری نا 2030ء نا ایجنڈا نا دوئی کننگ نا گچین کسر ءِ آوار کننگ مرے۔ پاکستانی سفیر منیر اکرم پارے کہ چندیملک آتے مچ آ دہائی ٹی شونداری مفننگ آن بچفنگ کن دمدستی بنداوتیا کاریم کروئی مریک۔ انتئے کہ کورونا دین آن ہرا نسخان مس اوفتا سوب آن ودی مروک آ کساد بازاری 90سال اٹی مروک آ بدترین کسادبازاری ءِ انتئے کہ داڑآن 120ملین بندغ بے روزگار مسنو۔ فورم نا دیوان اٹی پائیدار شونداری نا ہدف آتا تین پہ تینی تعلق و اودے سوگو کننگ آہم سجفنگک۔ منیر اکرم کورونا دین انا مروک آ نسخان تا مون ءِ توننگ کن کاریم کننگ نا دمدستی گرج آ زور شاغا انتئے کہ داڑآن نئے بیرہ نسخان تیان بچنگ اٹ کمک رسینگک بلکن پائیدار شونداری نا ہدف آتا دوئی کننگ اٹی ہم کمک رسینگک۔ ہراکہ مچ آ دنیاٹی گچینی اتنگ کن راہشون اصول ہم ارے۔ اومستی پارے کہ مچ آ دنیاٹی کورونا غان بحالی کن غٹ ملک آتا ویکسین تسکان رسینگ پیشگی شڑت ءِ۔
