اسلام آباد۔ 02جولائی (اے پی پی) چیئرمین سینیٹ محمد صادق سنجرانی پارینے کہ پاکستان کوریا تون تینا تعلقداری تے بھاز قدر انا نظراٹ ہرک، سویلی کوریا نا امن، جمہوریت و شونہالی نا کنڈآ پیش رفت متاثرکن ءِ، کوریانا ملٹی نیشنل کمپنیک سی پیک نا ڈٹ آتے ٹی پبی زرکاریکیر۔ داخیال آتا درشانی ءِ او سویلی کوریا نا سفیر سوسنگ پیوتون گپ وتران کرساکرے ہرا جمعہ نادے آ پارلیمنٹ ہاؤس اٹی اوڑتون اوڑدہی کرے۔ چیئرمین سینیٹ پارے کہ پاکستان کوریا تون تینا تعلقداری تے بھاز قدر انا نظراٹ ہرک۔ سویلی کوریانا امن، جمہوریت و شونہالی نا کنڈآ پیش رفت متاثرکن ءِ۔ اوپارے کہ منہ دہائی تیا گونڈ سفراٹی سویلی کوریا پدتموک ملک آن دنیا نا پوسکن انگا ٹیکنالوجی آن شپ زرگزران اٹ بدل کرینے۔ پاکستان و سویلی کوریا سرد جنگ اٹ اسہ ایلو نا بھاز خڑک ئسر۔ پاکستان کورین جنگ اٹی سویلی کوریا نا زرگزرانی و مالی کمکاری ءِ کرے۔ اوپارے کہ پاکستان اقوام متحدہ نا کشمیرنالائن آف کنٹرول نا بابت مشاہداتی مشن اٹ سویلی کوریانا شمولیت کن منت وار ءِ۔ پاکستان سویلی کوریا تون تینا زرگزرانی تعلقداری تے خاص اہمیت ایتک داننا ہڑتوم آ کنڈآتا رابطہ غاتا بنداو ءِ۔ کوریا تون تینا واپاریتعلقداری تے پین مون آ دننگ نا خواہندار ءِ۔ کوریانا ملٹی نیشنل کمپنیک سی پیک نا ڈٹ آتے ٹی پبی زرکاری کیر۔ سی پیک نا رداٹ خصوصی اکنامک زون علاقائی رابطہ کاری و شونداری کن بھاز اہم ءِ۔ محمد صادق سنجرانی پارے کہ نن سویلی کوریا تون غٹ بشخ آتے ٹی رابطہ غاتے مون آ دننگ خوانہ۔ دامسخت کن سیاسی و پارلیمانی تعلقداری تا مون آ دننگ اہم جوڑمریک۔ ہڑتوم آ ملک آتا نیام اٹ رابطہ کن پارلیمان، میڈیا و تعلیمی بشخ اٹ کمکاری ءِ مون آ دروئی مریک۔ پارلیمانی رابطہ غاتا مون آ دننگ کن ہڑتوم آ ملک آتا پارلیمان اٹ ساڑی سنگتی پڑک زیات فعال کڑد ادا کننگ کیک۔ اوپارے کہ تاریخی بدھ مت میرات و دودوربیدگ ہڑتوم آ ملک آتا نیام اٹ تعلقداری کن بھاز اہم ءِ۔
