اسلام آباد۔ 02جولائی (اے پی پی) بنجائی وزیر قومی غذائی رکھ و پٹ وپول سید فخرامام تون گلگت بلتستان نا وزیر کشت وکشار کاظم میسم اینو اوڑدہی کرے۔جمعہ نادے آ مروک آ اوڑدہی ٹی وزارت قومی غذائی رکھ و پٹ وپول انا خصوصی کمکار جمشید اقبال چیمہ و سیکرٹری کشت وکشار گلگت بلتستان ئسک ہم ساڑی ئسر۔ بنجائی وزیر سیدفخر امام پارے کہ ننا وزارت گلگت بلتستان ءِ آسراتی فراوان کننگ کن ہرگام گیج ءِ کیک۔ وزیر کشت وکشار بنجائی وزیر ءِ پارے کہ کشت وکشار نا بشخ اٹی بھلو و پٹ وپول اکن 4سال اکن 3.75ارب روپئی نا گرانٹ تننگانے۔ ڈٹ آتے پک بنجائی وزارت کرینے۔ بنجائی وزیر پارے کہ دا اولیکو موقع ءِ ہراتم حکومت پورو جوش و جوزہ اٹ کشت وکشار نا بشخ اکن متاماری کننگ ءِ۔ وزیر کشت وکشار گلگت بلتستان پارے کہ اودے فائیٹو سانٹری نظام و سند نا بابت گڑاس ویل مون تروک ءِ و اودامعاملہ ٹی بنجائی وزارت نا کمک ءِ خواہک۔ بنجائی وزیر پارے کہ گلگت بلتستان اٹی کشت وکشار نا شونداری کن نامیاتی چیری و خوبانی نا مارکیٹ نا ہدف ءِ مقرر کننگ مریک۔ جے آئی سی اے نا اسہ سروے اسے نا رداٹ تیارکروک 3.5لکھ ٹن چیری آن 30آن 40درسد اسکان زیان مریک۔ خوبانی نا کل 20لکھ ٹن پیدوار آن، کم و ود 40درسد زیان مریک، ودی مروک آ کل شہتوت نا 80درسد زیان مریک۔ وزیر کشت وکشار پارے کہ گلگت بلتستان نا کشت وکشار نا بشخ ءِ گچین کننگ کن مارکیٹنگ و زرکاری نا سخت گرج ءِ۔ سوف انا چندی وڑ ءُ و گلگت بلتستان اٹی کل کم و ود 9لکھ ٹن ودی مریک۔ بنجائی وزیر سوف انا پیدوارنا اہمیت اٹ ودکی کن میوہ کن دیر انا کمتی و جوس ہلنگ نا سلاہ ءِ پیش کرے۔ بنجائی وزیر داہم پارے کہ نامیاتی کھیتی باڑی نا بایدے است بڈی ءِ کننگے۔، داسلاہ تننگاسس کہ جام انا پیدوار میوہ غاتا گودہ نارکھ و گلگت بلتستان نا کاٹیج صنعت نا تائید کن اسہ عمل نا قابل ءُ آپشن اسے۔ پین داکہ گلگت بلتستان اٹ ٹراؤٹ فارمنگ نا نمو مننگ ءِ و مچ آ ملک اٹی فروزن ٹراؤٹ گدریفنگ انگ ءِ۔ مچ آ ملک اٹی 15ٹن فروزن ٹراؤٹ گدریفنگاسس۔
