اسلام آباد۔ 02جولائی (اے پی پی) صدر مملکت ڈاکٹر عارف علوی پارینے کہ دیر انا کاختی نا سوب آن کراچی نا شاری تے مشکل مون تروک ءِ۔ کراچی ءِ دیر انا فراوانی نا غٹ ڈٹ آتے وخت آ پورو کننگے۔ داخیال آتا درشانی ءِ او کراچی ٹی دیر انا حالیت آتیا دیوان نا کماشی ءِ کرسا کرے، دیوان اٹی کراچی ٹی دیر انا کاختی نا ایسری کن چندی سلاہ تا جاچ ءِ ہلنگا۔ دیوان ءِ دیر انا بابت برجاڈٹ آتیا مروک آ پیش رفت آہم حوال تننگا۔ دیوان اٹی بنجائی وزیر توانائی وپٹرولیم حماد اظہر، باسک سندھ اسمبلی فردوس شمیم نقوی، سی ای او حبکو، کامران کمال و ایلوبڑزکو کمامدارآک بشخ ہلکر۔ دیوان اٹی گورنر سندھ عمران اسماعیل و باسک سندھ اسمبلی سمرخان آن لائن بشخ ہلکر۔ دیوان آن تران کرسا صدر مملکت ڈاکٹر عارف علوی پارے کہ دیر انا کاختی نا سوب آن کراچی نا شاری تے مشکل مون تروک ءِ، کراچی ءِ ہڑدے 1100آن 1200ملین گیلن دیر انا گرج ءِ۔ اوپارے کہ کراچی کن دیر انا ڈٹ آتے فاسٹ ٹریک بنداوتیا پورو کننگ نا گرج ءِ۔ کراچی ءِ دیر انا فراوانی نا غٹ ڈٹ آتے وخت آ پورو کننگے۔ صدر مملکت پارے کہ کراچی نا ویل آتا زوت ایسری و شاری تا آسودہی حکومت نا اولیت ءِ، تعلقدار اسٹیک ہولڈر آتا کمک و سوگو کوشست آتیان ویل آتا زوت ایسر ممکن ءِ۔
