راولپنڈی ٹی لئی بزنس ڈسٹرکٹ ڈٹ و گوجرانوالہ ٹی شونداری ڈٹ آتیان زرگزرانی سرجزآتے ٹی ودکی مریک، وزیراعظم عمران خان نا کماشی ٹی قومی رابطہ کمیٹی ہاؤسنگ، تعمیرات و شونداری نا دیوان

اسلام آباد۔ 02جولائی (اے پی پی) وزیراعظم عمران خان پارینے کہ راولپنڈی ٹی لئی بزنس ڈسٹرکٹ ڈٹ و گوجرانوالہ ٹی شونداری ڈٹ آتیان زرگزرانی سرجزآتے ٹی ودکی مریک، ڈٹ آتون تعلقدار ہدف آتا دوئی کننگ تخوک و پک کروک مدانا تہہ ٹی پک کننگے۔ داخیال آتا درشانی ءِ او جمعہ نادے آ قومی رابطہ کمیٹی ہاؤسنگ، تعمیرات و شونداری نا دیوان نا کماشی ءِ کرسا کرے۔ دیوان اٹی وزیرمملکت حوالکاری و شینکاری فرخ حبیب، خصوصی کمکار ملک امین اسلم، ڈاکٹر شہباز گل، چیئرمین پوسکن آ پاکستان ہاؤسنگ و ڈویلپمنٹ اتھارٹی لیفٹیننٹ جنرل (ر) انورعلی حیدر و سینئر آفیسر آک بشخ ہلکر وخت اس کہ ویڈیو لنک انا کمک اٹ وزیر ہاؤسنگ پنجاب میاں محمود الرشید، سلاہکار ڈاکٹر سلمان شاہ و چیف سیکرٹری پنجاب ئسک ہم بشخ ہلکر۔دیوان ءِ راولپنڈی لئی بزنس ڈسٹرکٹ ڈٹ انا بارواٹ سرجم حوال تننگا۔ سلاہکار وزیراعلیٰ پنجاب ڈاکٹر سلمان شاہ دیوان ءِ معلومدار کرے کہ دا ڈٹ آن راولپنڈی نالہ لئی نا ہڑتوم آ کنڈآتا ایکسپریس  وے انا تفنگ، نالہ لئی نا سفائی و چارمہ کنڈاٹ بزنس ڈسٹرکٹ نا تفنگ اوار ءِ۔ داڈٹ انا سوب آن نوکاپی حالیت آتیان شاری تا جان و مال انا رکھ ممکن مننگ کیک، دا ڈٹ پبلک پرائیویٹ پارٹنر شپہ ماڈل نا رداٹ چلیفنگک ہراٹی حکومت بیرہ ڈغار فراوان کیک۔ دا ڈٹ انا رداٹ سلاہ ئی بزنس ڈسٹرکٹ آن بھلو زرگزرانی فائدہ سے نا کساس ءِ خلنگانے۔ دیوان ءِ ڈٹ اکن درکار کانودی ترمیم، انتظامی پنجر و ٹائم لائن نا بارواٹ ہم معلومدار کننگا۔ چیف سیکرٹری پنجاب دیوان ءِ گوجرانوالہ ڈویلپمنٹ پلان آ حوال تس۔ دیوان ءِ پاننگاکہ گوجرانوالہ کن مالی سال 2021-22صوبائی و بنجائی شونداری پروگرام اٹی 40ڈٹ آتے اوار کننگانے ہرافتے ٹی کشت وکشار، صنعت، سڑک آتا تفنگ و جوڑ جاڑ، چاگڑدی رکھ، کنوئی ءُ دیر و سیوریج اوار ءِ۔ وزیراعظم ہڑتوم آ ڈٹ آتا فائدہ غاتے تالان کرسا پارے کہ دافتیان زرگزرانی سرجزآتے ٹی ودکی مریک و شاری تے براہ راست فائدہ دوئی مریک۔، وزیراعظم پارے کہ ڈٹ بندی ءِ گچین کننگ کن پرائیویٹ سیکٹرنا چاہندارآتیان سلاہ ہلنگے۔ ڈٹ آتیان گچین زرگزرانی فائدہ دوئی کننگ کن گیگ بدل پلان جوڑ کننگے۔ اوپارے کہ سرکاری ڈغار تے واگزار کرفنگ ءِ اولیت تننگے۔ اوپارے کہ ڈٹ آتا بابت ہدف آتے تخوک آ و طے مروک مدانا تہہ ٹی پورو کننگے۔