اسلام آباد۔ 02جولائی (اے پی پی) وزیراعظم عمران خان پارینے کہ پیشن نا ملک پاکستانیک ملک انا بے بہا میرات ءُ، پیشن نا ملک آتے ٹی رہینگوک آ پاکستانی تا کنڈآن مون تروک آ زرانا ملکی زرگزران نا سوگوی ٹی اہم ءُ کڑد اسے، وطن نا شونداری و شونہالی ٹی بشخ شاغوک آ پیشن نا ملک آتے ٹی رہینگوک آ پاکستانیک و اوفتا خاہوت آتے آسودہی و آسراتی فراوان کننگ کن حکومت سنبرینگوک ءِ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم عمران خان جمعہ نادے آ ملکی ترسیلات زراٹی ودکی نا بابت دیوان نا کماشی ءِ کرسا کرے۔ دیوان اٹی وزیر خزانہ، وزیر اقتصادی امور، سلاہکار واپار، خصوصی کمکار نیشنل سیکورٹی، ریونیو (محصولات)و ایلو سینئر کمامدارآک بشخ ہلکر۔ ترسیلات زراٹی ودکی و ملکی زرگزران ءِ پین سوگو کننگ نا بابت پیشن نا ملک پاکستانی تا کنڈآن گدریفوک آ زر آتیا حکومت نا کنڈآن تروک آ آسودہی، روشن ڈیجیٹل اکاؤنٹ نا سرسہبی، ملکی برآمد آتے ٹی ودکی خاص کر آئی ٹی تون تعلقدار برآمد آتے ٹی ودکی، درملکی زرکاری نا مون آ دننگ و چندی شونداری ڈٹ آتا بابت چندی ملک و ادارہ غاتون ہڑتوم آ کنڈآتا معاہدہ غاتے ایسر اسکان سرکننگ نا بابت تعلقدار باندات آتیا سرجم سجفنگا۔ اسٹیٹ بینک انا کنڈآن دیوان ءِ پاننگاکہ ترسیلات زر انا مداٹی حکومت نا کنڈآن پیشن نا ملک رہینگوک آ پاکستانی تے پرکشش آسودہی تننگ نا حکومتی پالیسی نا خاطرخواہ بھرم دوئی مننگ ءِ۔ دیوان ءِ پاننگاکہ روشن ڈیجیٹل اکاؤنٹ نا مد اٹی بیرہ دہ تُو انا چنکو وخت اسے ٹی داتم اسکان 1.561ارب ڈالر دوئی مسنے و دافتے ٹی پدریسہ ودکی مننگ ءِ۔ دیوان ءِ پاننگاکہ مالی سال 2018ء آن داتم اسکان کورونا نا دین آن پد ہم ترسیلات زر اٹی پدریسہ ودکی مون آ بسنے ہراکہ پیشن نا ملک پاکستانی تا ساڑی آ حکومت نا پالیسی و وزیر اعظم عمران خان نا لائخی تیا پورو پت انا درشانی ءِ۔ دیوان ءِ پاننگاکہ پیشن نا ملک پاکستانی تا آسراتی کن ”نیشنل ریمٹنس لائلٹی پروگرام“ نابناءِ ہم زوت کننگک۔ داپروگرام نا کمک اٹ اسہ موبائل ایپلی کیشن اس درستی راستی کرفنگک و ترسیلات زر مون تروک آ پیشن نا ملک رہینگوک آ پاکستانی تے پین مالی آسودہی فراوان کننگک۔ داپروگرام نا بناءِ پی آئی اے، ایف بی آر، نادرا، اسٹیٹ لائف، اوپی ایف، بنیوولینٹ اینڈ اولڈ ایج ایمپلائز فنڈ و ایلو سرکاری ادارہ غاتا شریداری اٹ کننگک۔ داپروگرام تون وابستہ پیشن نا ملک پاکستانی تے ہنداادارہ غاتیان آسراتی دوبریک۔ دیوان ءِ روشن ڈیجیٹل اکاؤنٹ، روشن تینا گاڈی اسکیم و روشن راجی خذمت نا سرسہبی تا بابت حوال دیوان ءِ پاننگاکہ دارداٹ ”روشن تینا اُرا“ اسکیم نابناءِ ہم زوت کننگک۔ سلاہکار واپار چندی بشخ آتے ٹی برآمد آتے ٹی ممکنہ ودکی خاص وڑاٹ آئی ٹینا بشخ اٹی ملکی کچ ءِ کاریم اٹ اتنگ نا بابت سرجم حوال تس۔ زرکاری بورڈ انا کنڈآن پاننگاکہ درملکی زرکارآتا آسراتی کن حکومتی کہول آ ہرممکنہ کوشست کننگ انگ ءِ و کاروبار کننگ اٹ پین آسانی ودی کننگ نا بابت آن کوشست آک برجاءُ۔ وزیراعظم عمران خان دیوان آن تران کرسا پارے کہ پیشن نا ملک پاکستانیک ملک انا بے بہا میرات ءُ۔ پیشن نا ملک رہینگوک آ پاکستانی تا کنڈآن گدریفوک آ ترسیلات زر انا ملکی زرگزران نا سوگوی ٹی اہم ءُ کڑد اسے۔ وطن نا شونداری و شونہالی ٹی بشخ شاغوک آ پیشن نا ملک رہینگوک آ پاکستانی و اوفتا خاہوت آتے آسراتی و آسودہی فراوانی کن حکومت سنبرینگوک ءِ۔ وزیراعظم پارت کرے کہ پیشن نا ملک رہینگوک آ پاکستانی تے ترسیلات زر انا رداٹ پین آسراتی فراوان کننگ آ سجفنگے۔ زرگزرانی شونداری و ودوک آ شرح نمو ءِ مون آ تخسا زرمبادلہ و ایلو زرگزرانی گرج آتے مون آ تخسا مفصل و منظم ڈٹ بندی کننگے۔ وزیراعظم نا تعلقدار وزارت آتے پارت کرے کہ ترسیلات زر انا رداٹ چندی بشخ آتے ٹی آخبت نا ہدف آتے مرتب کرسا اوفتا دوئی کننگ نا بابت حکمت عملی اس جوڑ کننگے۔
