اسلام آباد۔1جولائی (اے پی پی): مزن وزیر ءِ ھاسیں کمکار برائےوردن ءُ ورا ءِ رکھینوک جمیشد اقبال چیمہ ءَ گوشت کہ مزن وزیر ءَ اے سیم سر گیشینتگ کہ پاکستان ءَ را وراک ءِ درآمد کنگ ءِ مٹ ءَ برآمد کنوکیں ملک ءِ جوڑ کنگی انت، فوڈ سیکورٹی نیشنل سیکورٹی ءِ وڑ ءَ باز ارزشتی انت، گوستگیں وھد ءَ ایشرا ڈلگچار کنگ بوتگ، عمران خان اولی مزن وزیر انت کہ آئی ءَ کشت ءُ کشار ءَ را وتی اولی کار نامینتگ، سرجمیں ملک ءَ آپ ءِ یک یک ترمپے ءَ را کارمرد کنان ءَ جتا جتائیں دمگ آنی رد ءَ کشار ءُ فروٹ کشاں۔ اے ھیالانی درشانی آئی ءَ پنچ شمبے ءِ روچ ءَ کنونشن سنٹر ءَ راجی دھکان کنونشن ءَ گوں گشتانک دیان ءَ کت۔ ایشی ءَ پیسر مزن وزیر ءَ دھکان کنونشن ءِ بنگیج کت۔ مزن وزیر ءَ جتا جتائیں سٹالز آنی ھم چار ءُ تپاسی کت۔ ھاسیں کمکار برائے وردن ءُ وراک ءِ رکھینوک جمشید اقبال چیمہ ءَ مراگش ءَ را گشتانک دیان ءَ گوشت کہ گیش بوھوکیں آباتی ءِ وردنی ضلورت مئے پیداوار ءَ چہ گیش انت۔ پاکستان مرچی وردنی توک آنی درآمد کنوکیں ملک ءِ نہ ات، ما 1960 ءَ چہ وردنی توم درآمد کنگ ءَ آں، 22 کروڑ مردم آنی وردنی ضلورت ءَ را سرجم کنگ آسان نہ انت، مارا وردنی توم برآمد کنوکیں ملک جوڑ بوھگی انت۔ آئی ءَ گوشت کہ ساپیں گوات، شرکنیں آپ ءُ وراکی ھمک بنی آدم ءِ ضلورت انت، مزن وزیر ءَ ملک ءَ 10 ارب درچک کشگ، ڈیمز ءِ جوڑیشت ءِ منصوبگ بندات کتگ، ایٹماسپیئر ءِ شوبگ ءَ ارزشت داتگ۔ آئ8ی ءَ گوشت کہ پاکستانی دھکان ڈن ملک ءَ کٹ کتگیں پیسہ ءَ را ھم وتی زمین ءَ ھرچ کنت نا کہ زمین ءَ چہ کٹ کتگیں زر آناں ڈن ءَ بارت۔ آئی ءَ گوشت کہ پنجاپ ، بلوچستان، گلگت بلتستان، پوٹھوہار، خیبر پختونخوا ءَ ھوار سرجمیں ملک ءَ کشت ءُ کشار ءِ شوبگ ءَ بے کساس موہ است انت، جتا جتائیں دمگ آنی کشار ءُ پیداوار ءِ واستہ باز جوانین انت، گلگت بلتستان ءَ ہزارانی میل ءِ 19 دریا انت ایشانی تہ ءَ ماھی کشگ ءِ بے کساس موہ است انت، گلگت بلتستان ءَ فوڈ پروسیسنگ پلانٹس جنگ ءِ ضلورت انت۔ ایشی ءَ ابید گلگت بلتستان ءَ رستگیں جتا جتائیں نمونگ ءِ جڑی بوٹی آں چہ سیت چست کنگ ءِ ضلورت انت۔ آئی ءَ گوشت کہ بلوچستان ءُ ڈیرہ اسماعیل خان ءَ ھوار سرجمیں ملک ءِ کوھی دمگ آنی تہ ءَ کوھ آں چہ اتکگیں آپ ءِ یک یک ترمپ ءَ را جم کناں، کسانیں ءُ ٹوھیں ڈیم جوڑ کناں۔ آئی ءَ گوشت کہ پیسریگیں حکومت ءَ وزارت ءِ کلی بجٹ 1.6 ارب ایگ انت۔ مرچی 10 ارب ایوک ءَ ریسرچ ءِ بجٹ انت۔ آئی ءَ گوشت کہ دھکان آناں مڈل مین ءَ چہ آجوئی دیاں، ٹیل ءِ برآمد کنگ ءِ رد ءَ بے کساس زر امبار ھرچ بیت، ما زیتون ءِ درچک کشت ءُ ھندی تک ءَ ٹیل جوڑ کناں، سویا بین ءُ مکئی ءِ کشت ءِ ھوالگ ءَ ھاسیں دلگوشی دیاں۔ آئی ءَ گوشت کہ پاکستان ءَ 10 کروڑ دلوت انت، دلوت آنی گہتریں نسل جوڑ کناں، تیاب دپ ءَ لکھانی پام آئل ءِ درچک کشاں، چولستان ءِ لکھانی ایکڑ زمین ءَ را کشت ءُ کشار کناں، شیر ءِ پیداور ءَ را گیش ودینگ ءَ ھاسیں دلگوشی دیگ بوھگ ءَ انت۔
