اسلام آباد۔1جولائی (اے پی پی): مزن وزیر عمران خان ءَ گوں وردن ءُ وراکی رکھینگ ءَ را آیکویں باندات ءَ ٹوھیں جیڈھ ءِ نامینان ءَ گوشت کہ کشت ءُ کشار ءِ شوبگ ءَ زوتیں دلگوشی نہ دات گڈا فوڈ سیکورٹی نیشنل سیکورٹی ءِ جیڈھ جوڑ بیت، ما کشت ءُ کشاری پٹ ءُ پول، جوانیں توم، کشت ءُ کشار ءِ ھاترا درچتگیں ڈگار ءُ زمین آنی نشان دیگ ، کسانیں دھکان آناں ھیل کاری دیگ ءُ وام دیگ، دھکان آناں کاٹ ءِ وسیلگ ءَ ڈائریکٹ سبسڈی ءُ نوکیں ٹیکنالوجی آناں کارمرد کنان ءَ وردن ءُ وراک ءِ رکھینگ ءَ را دل یکیمی ءِ گوما پاکستان ءَ را کشت ءُ کشار ءِ شوبگ ءَ درآمد کنگ ءِ ؐٹ ءَ برآمد کنوک جوڑ بکن انت۔ گوستگیں وھد ءَ کجام ھم حکومت ءَ کشت ءُ کشار، صنعت ، سیل ءُ سواد ءُ لس مردم ءُ ھمزوریں تبک ءِ سر ءَ دلگوشی دیگ نہ بوتگ ءُ آوانی گہتری ءِ بابت ءَ سسا نہ کتگ، چین ءَ 35 سال ءَ 70 کروڑ مردم آناں گریبی ءَ چہ در کتگ، ریاست مدینہ ءِ کار ھمزوریں تبک ءِ مردم آناں آسودگ کنگ انت۔ آ پنچ شمبے ءِروچ ءَ کنونشن سنٹر ءَ نیشنل دھکان کنونشن ءَ گوں گشتانک دیگ ءَ اَت۔ بنجاھی وزیر وردن ءُ وراک ءُ پٹ ءُ پول سید فخر امام، ھاسیں کمکار برائے وردن ءُ وراک ءِ رکھینگ جمیشد اقبال چیمہ ءَ ھم کنونشن ءَ گشتانک دات۔ مزن وزیر ءَ گوشت کہ مئے آیوکیں وھد ءَ بازیں چیلنجز است انت، فوڈ سیکورٹی ایشانی تہ ءَ سک باز چیلنز است انت، گوستگیں سال ءَ ما 40 لکھ ٹن گندم درآمد کتگ ایشیءِ نیاد ءَ بازیں زر امبار ءِ ھرچ بوتگ، پاکستان ءِ آباتی گوں ترندی ءَ گیش بوھگ ءَ انت۔ آیوکیں وھد ءَ اینچو گیش بوھوکیں آباتی ءِ واستہ گلہ شوہاز کنگ ءُ ایشانی وردن ءِ ضلورت ءَ پیلو کنگ ٹوھیں جیڈھ ءِ بیت۔ مزن وزیر ءَ گوشت کہ مارا آیوکیں وھد ءِ واستہ تیاری کنگ لوٹ ایت ءُ اے وڑیں ملک ءِ جوڑ مہ باں ھما کہ وتی الس ءِ وردن ءِ ضلورت ءَ را پیلو کت مہ کنت۔ مزن وزیر ءَ گوشت کہ پاکستان ءَ 40 درسد زھگ وردن ءُ وراک ءِ کمی ءِ آماچ انت ایشی ءِ سبب ءَ آ نہ رُدگ ءَ انت، شیر کہ زھگ آنی بنیاتی ضلورت انت، ایشی ءِ پجاری ٹوھیں جیڈھ ات، شہر آنی تہ ءَ انچیں شیر بھا کنگ بوھگ ءَ انت کہ ایش واشنگ مشین ءَ یوریا ءُ دگہ باریں چے چے مان کنگ بوھگ ءَ انت وھد ءِ ما ترندی کت گڈاس شیر ءِ نیاد باز گیش ود اتنت۔ وھد ءِ گیش پٹ ءُ پول کنائینگ بوت گڈاس زانگ بوت کہ مئے شیر دیوکیں دلوت ءُ یورپ ءِ مقابلہ ءَ 6 سرئی کم شیر دینت، اچ کس ءَ گوستگیں وھد ءَ دلوت آنی جوانیں نسل ءِ تیاری ءِ بابت ءَ سسا نہ کتگ، پاکستان ءِ اے جیڈھ انت کہ کسانیں تبک ءَ آسراتی آناں وتی پنجگ آں کتگ، توامیں آسراتی ھماوانی واستہ انت، دیمروئی ءِ کار ءَ لس مردم آناں ھوار کنگ نہ بوتگ ھمے وڑ کہ انگریز آں ادا زوراکی ءِ وھد ءَ وتی واستہ جتائیں دمگ ءُ نندگ جاہ جوڑ کتگ ھمے رنگ ءَ سیر لاپ آنی واستہ انگلش میڈیم سکول ءُ پرائیویٹ ہسپتال جوڑ بوتگ انت ءُ وانگ ءُ زانگ ءُ جان سلامتی ءِ سرکاری نظام تباہ بوتگ، لس مردم ءَ را انصاف نہ رسیت چیا کہ آ گرانیں وکیل ءِ ازمت آں در جت کت نہ کناں، کبزہ گیر ودی بوت انت، دراجیں مُدتاں تاں کیس چیلئیتگ انت، گیواری نہ بوتگ انت، کشت ءُ کشار ءِ شوبگ ءَ ھم ھمے وڑ بوتگ۔ مزن وزیر ءَ گوشت کہ تاں وھد ءِ کسانیں دھکان آناں کمک نہ رس ایت آ جوانیں توم در جت کُت نہ کناں، وتی زمین ءِ سر ءَ پیسہ ھرچ کت نہ کناں، وتی کشار ءَ را امبار آں جم کت نہ کناں، ھمے واستہ دھکان آں چہ سستائیں دام ءَ توم بھا زورگ ءُ گرانیں دام ءَ بھا کنگ بیت، ملکی نظام ءَ ھمک جاہ ءِ کسانیں تبک ءِ مردم آناں ڈلگچار کنگ بوتگ وھدیکہ حکومت ءِ کار ھمزوریں تبک ءِ مردم آنی چار ءُ گزار کنگ انت، من مدینہ ءِ ریاست ءِ گپ ءَ کناں، مدینہ ءِ ریاست انصاف ، انسانیت ءُ وت مسترئی ءِ رھبند آنی رد ءَ برجا بوتگ ایشی ءَ جھلی تبک ءَ را برز ءَ چست کتگ، چین ءَ ھم ھمے رھبند آنی پد ءُ رند کتگ، ءُ 35 سال آنی تہ ءَ 70 کروڑ مردم آناں گریبی ءَ چہ در کتگ۔ آواں کوچگ آنی تہ ءَ کسانیں دھکان آناں کمک کتگ، مارا ھم 74 سال پیسر اے وڑیں گامگیج کنگی ات بلے ما نہ کتگ۔ اگاں ما انوں اے گامگیج نہ کتاں گڈاس فوڈ سیکورٹی نیشنل سیکورٹی ءِ جیڈھ جوڑ بیت، کھام ھم ملک ءَ اگاں 15 بگر تاں 30 درسد مردم شد لاپ بنت گڈا آ راج دیمروئی کت نہ کنت۔ مزن وزیر ءَ گوشت کہ اے وھد ءَ جاور ھال ایش انت کہ مارا وردن ءُ وراک ءِ سامان ڈن ءَ چہ لوٹارینگ کپ ایت، مارا اے جاور ھال آنی پجار کنگی انت، نا تو اے نیشنل سیکورٹی ءِ جیڈھ جوڑ بیت۔ آئی ءَ گوشت کہ اللہ تعالیٰ ءَ دگہ نپس دار آناں اے وڑیں آسراتی نہ داتگ انچیں کہ بنی آدم آناں داد داتگ۔ اللہ تعالی ءَ مار ا ھمک رنگیں آسراتی داتگ بلے ما را وتی سر ءَ بیسہ نیست، چے بلوچستان ءَ ما اے رنگیں چیز کشت کناں بلے اچ کس ءَ اے بابت ءَ سسا نہ کتگ، اسرائیل آئی ءَ را ما فلسطین ءِ سر ءَ ظلم کنگ ءِ سبب ءَ نہ مناں آئی ءَ کشت ءُ کشار ءِ پٹ ءُ پول ءُ ٹیکنالوجی ءِ سر ءَ دلگوشی داتگ ءُ ریگستان ءَ کشار کشتگ، مارا وتی دھکان آنی کمک کنگ لوٹ ایت۔ کشت ءُ کشار ءِ پٹ ءُ پول ءَ کنان ءَ دھکان آناں سرپد کنگ لوٹ ایت کہ اے دمگ آنی واستہ کجام کجام کشار جوان انت، دھکان آناں جوانیں توم پجاری کنگی انت، نوکیں ٹیکنیک آناں کارمرد کنگی انت ءُ دھکان آناں ھیل کاری دیگی انت، ما سی پیک ءَ کشت ءُ کشار ءَ را ھم ھوار کتگ۔ آئی ءَ گوشت کہ چین ءِ کشت ءُ کشاری ٹیکنالوجی ءُ تجروبت آں چہ سیت چست کناں ءُ چین ءِ نمونگ ءَ کوچگ آنی تہ ءَ نندوکیں کسانیں دھکان آنی کمک ءَ کناں ھرکسی کرا آسراتی کم انت آواں بینک ءَ چہ وام پجاری کناں۔ پنجاپ ءَ دھکان کاٹ ءِ ھوالگ ءَ جوانیں کار کتگ۔ مزن وزیر ءَ گوشت کہ مئے کرا چولستان ، ڈی آئی خان، پیسریگیں قبائلی ضلع ءَ ھوار بے کساس کشت ءُ کشاری زمین است انت، آئی ءَ گوشت کہ دھکان آناں وشھال کناں ، آ وتی زمین ءَ وت پیسہ ھرچ کناں، ما شکرکانڑیل ءِ دھکان آنی واستہ وھد ءُ موہ ءِ سر ءَ کرشنگ ، ادائیگی ءُ سرجمیں نیاد ءَ را دل یکیمی جوڑ کتگ، اولی رنگ ءَ دھکان آنی کرا اینکیاس پیسہ اتکگ، 100 ارب کلدار دھکان آناں رستگ، آئی ءَ آ پیسہ کشار ءِ سر ءَ ھرچ کتگ انت ھمے ھاترا ریکاٹی پیداوار بوتگ۔ مزن وزیر ءَ گوشت کہ اللہ پاک ءَ مارا اینکاس ازمکاری ءُ آسراتی پجاری کتگ مارا اچ کس ءِ دیم ءَ دست دراج کنگی نہ انت۔ ایوک ءَ سیل ءُ سواد ءِ پڑ ءَ چہ بے کساس زر کٹ کت کناں گوستگیں حکومت آں کشت ءُ کشار، صنعت ، سیل ءُ سواد ءُ لس مردم ءِ واستہ وانگ ءُ زانگ ءِ آسراتی آنی پجاری ءِ ھوالگ ءَ اچ دلگوشی نہ داتگ۔ مزنوزیر ءَ گوشت کہ اللہ پاک ءَ پاکستان ءَ را ھاسیں مول ءُ مراد ءِ واستہ جوڑ کتگ، قائداعظم محمد علی جناح ءَ گوشتگ بوتگ کہ پاکستان دگنیا ءِ واستہ یک درور ءِ جوڑ بیت، منا اُمیت انت کہ پاکستان آیوکیں وھد ءَ یک ھاسیں بستار ءِ شوہازئیت۔
