اسلام آباد۔ 01جولائی (اے پی پی) وزیرخارجہ مخدوم شاہ محمود قریشی پارینے کہ امریکہ و پاکستان نا مسخت اسٹ ءِ، بھارت تون امن خوانہ ولے کشمیر آن خن تے اسہ کنڈ کننگ کپنہ۔ ترسیلات زر انا کچ برآمد آتا کچ آن گدرینگانے۔ پنچ شنبے نادے آ وزیراعظم عمران خان نا پارلیمنٹ اٹ تران و جم سیاسی حالیت آتا بابت اسہ بیان اسے ٹی وزیر خارجہ پارے کہ وزیراعظم درو حکومتی پالیسی ءِ پیدوار کرے، نن بھارت تون امن خوانہ ولے کشمیر آن خن تے اسہ کنڈ کننگ کپنہ۔ وزیراعظم پارے کہ اگہ ہندوستان، تینا غیر کانودی کوزہ گیری ٹی جموں و کشمیر اٹی حالیت آتے مست آنبار اتیک تو نن اوڑتون ہیت وگپ کن تیار اُن۔ اوپارے کہ اینو اوغانستان اٹی امن نا بابت امریکہ وپاکستان نا مسخت اسٹ ءِ، اینو امریکہ ہم داہیت انا قائل مسنے کہ اوغانستان نا ویل انا ایسری فوجی اف۔ ہراکہ نن پارینہ اینو دنیا ننا موقف ءِ امنا کننگ ءِ۔ شاہ محمود قریشی پارے کہ نن پیشن نا ملک رہینگوک آ پاکستانی تے وونٹ انا حق تننگ خوانہ، کاش اپوزیشن داکسر اٹ اڑاند مف۔ شاہ محمودقریشی پارے کہ شہباز شریف ہراسلاہ ءِ تسنے او عمل نا قابل اف، اینو ہندن ءُ ٹیکنالوجی اس ساڑی ءِ ہرادے کاریم اٹ اتسا پیشن نا ملک رہینگوک آ پاکستانیک، پاکستان ناکمک ءِ ہم کننگ کیرہ و اسٹیک ہولڈرہم مننگ کیرہ۔ شاہ محمود قریشی پارے کہ وزیراعظم پارے پاکستان نا قربانی تا اعتراف ءِ کننگتو۔ پاکستانی قوم انا سفت نا جاگہ غا اوفتیا تہمت خلنگا۔ مستین اٹ منہ بندغ تینا اقدار ءِ مون آ دننگ کن پاریر کہ نم جلہو کرسا کبو نن مذمت کرسا کینہ۔ وزیرخارجہ پارے کہ امریکہ تون تعلقداری بھاز جوان ءِ، ولے دانا دامطلب اف کہ ننا ہچ ءُ عزت اس اف۔ اوغانستان نا بابت اوپارے کہ نن خواپنہ اوغانستان اٹی پین جنگ مرے، نن ہموڑے امن خوانہ۔ اوغانستان اٹی امن نا زمواری اوغان سرکڑدہ غاتیا عائد مریک۔ مخدوم شاہ محمود قریشی پارے کہ خدانخواستہ اوغانستان نا حالیت آک بگڑینگرہ تو اوغانستان آن پد پاکستان غٹ آن زیات زہمی مریک۔ ملکی سیاسی حالیت آتا بابت وزیر خارجہ پارے کہ درو بلاول ناپہہ ئی ٹی گپ وتران کریکہ، ہراروایت آتا بلاول ہیت ءِ کریکہ او سندھ اٹی انت اکن افس۔ ای ہراتم بلاول ءِ آدینک ءِ نشان تسٹ تو او ذاتی جلہو آتیا بس سلیس۔ اوپارے کہ داسہ دا پیپلزپارٹی ذوالفقار علی بھٹو زوالا اف زرداری والا پارٹی ءِ، بلاول، بھٹوآخا،بلاول زرداری ءِ۔ وزیرخارجہ پارے کہ سندھ اٹی کرپشن آسمان ءِ سرمننگ ءِ نن تو اولیکو دے آن ہنداپارسا بسونن کہ اپوزیشن ننا ہیت ءِ بنے۔
