اسلام آباد۔ 01جولائی (اے پی پی) پاک فضائیہ نا سروک ایئرچیف مارشل ظہیر احمد بابر سدھو ترکی نا شار قونیاٹی مسٹ میکو مین جیٹ بیس انا دورہ ءِ کرے ہراڑے او کثیر الملکی فضائی مشق، ”اناطولین ایگل۔ 2021“ نا معائنہ ءِ کرے۔ پاک فضائیہ نا ترجمان نا رداٹ ایئرچیف ءِ فضائی مشق انا اڈتننگ نا بارواٹ سرجم حوال تننگا۔ بشخ ہلوک آتون گپ وتران کرسا ایئر چیف مشق اٹ اوار ایئرکریونا آپریشنل تیاری و کسبی چاہنداری تا ستاءِ کرے۔ اوحقی جنگی رداٹ میرات آتا ہم آہنگی و اوفتا فضائی آپریشن آتے ٹی گچین کاریم اٹ اتنگ کن تربیت نا اہمیت آ ہم زور شاغا۔ اومستی پارے کہ ”داوڑنامشق آک سنگت ملک آتا فوج آتا نیام اٹ ہم آہنگی و کمکاری نا دوئی کننگ اٹ بھاز گچین جوڑمریک۔”اناطولین ایگل اسیجائی مشق آک ترکی و پاکستان اٹ ہرسال واری واری آ اڈتننگرہ۔ داسال دامشق اٹی ترکی، آذربائیجان، پاکستان و قطرانا فضائی فوج آک بشخ ہلنگ ءُ۔ پاک فضائیہ نا دستہ جے ایف۔ 17تھنڈر جہاز آتیا تالان ءِ ہراٹی پی اے ایف نا چندی یونٹ و اسکواڈ رنزانا تربیت یافتہ عملہ شریک ءِ۔ مشق انا مسخت بشخ ہلوک آ فضائی فوج آتا نیام اٹ تین پہ تینی آپریشنل کچ ءِ مون آ دننگ ءِ۔
