اسلام آباد۔1جولائی (اے پی پی): مزن وزیر عمران خان ءَ گوشت کہ پاکستان چین ءِ گوما سیاسی، اقتصادی ءُ تجارتی یکوئی آناں مھکم کنگ ءِ واھشت ایگ انت، سی پیک بیلٹ اینڈ روڈ گامگیج ءَ کلیتی منصوبگ ات، سی پیک منصوبگ ءِ چار ءُ تپاسی ءِ واستہ یک مزن تکی کمیٹی ءِ جوڑ کتگ، آیوکیں وھد ءِ چین ءِ تر ءُ تاب ءِ وداریگ آں، پاکستان ءُ چین ءِ میڈیا ءِ نیام ءَ نزیکیں کمک ءِ واھشت ایگ انت، چین ءِ کمیونسٹ پارٹی ءُ سروکی ءِ سد سال سرجم بوھگ ءِ پد ءَ مبارک بات دیاں۔ مزن وزیر ءَ اے ھیالانی درشانی چینی میڈیا ءَ گوں تران کنان ءَ کت۔ آئی ءَ گوشت کہ پاکستان ءُ چین ءِ یکوئی سک باز نزیکیں ءُ جھلانکین انت۔ مئے میڈیا ءُ دود ءُ ربیدگ اینکیاس ھمگونگ نہ انت اینکیاس مئے سیاسی یکوئی انت۔ مزن وزیر ءَ گوشت کہ چینی میڈیا ءَ گوں مرچی گند ءُ نند ءِ مول ءُ مراد میڈیا ءِ رابطہ آناں دیمروئی دیگ انت۔ پاکستان ءَ ما صدر شی جن پنگ ءَ را نوکیں دور ءِ یک ٹوھیں سیاستدان ءِ لیکاں۔ پاکستانی نمونگ ءَ آئی ءَ چہ متاثر انت، یک ءِ وا کرپشن ءِ ھلاپ ءَ آئی ءِ جنگ انت۔ چینی صدر ءِ لٹ ءُ پُل ءِ گر ءُ دار کامیات انت ءُ پاکستانی آواں چہ باز متاثر انت۔ مزن وزیر عمران خان ءَ گوشت کہ چین ءِ یک دگہ ٹوھیں گامگیج ءِ ایش انت کہ آواں گریب آناں گریبی ءَ چہ در کتگ۔ چین ءَ 70 کروڑ مردم آناں گریبی ءَ چہ در کتگ۔ چین ءَ جا ر جتگ کہ آئی ءَ اے ھوالگ ءَ باز لُکوکیں ساھت ءَ جوانیں کامیاتی در جتگ۔ منی ھیال انت کہ کجام ھم بنی آدمی چاگرد ءَ اے وڑیں درور نہ رس ایت۔ آئی ءَ گوشت کہ من سی پیک منصوبگ آنی چار ءُ تپاسی ءِ واستہ یک ٹوھیں تک ءِ کمیٹی ءِ جوڑ کتگ۔ من آیوکیں ھپتگ ءَ گوادر ءَ روگ ءَ آں۔ من آھوادا سی پیک منصوبگ آنی کار ءِ گام آناں چار ءُ تپاسی گراں۔ من آھودا چینی کارندہ آں گوں گند ءُ نند کناں۔ مزن وزیر عمران خان ءَ چین ءِ استیں تر ءُ تاب ءِ تران ءَ کنان ءَ گوشت کہ آیوکیں یک دو ماہ ءَ وتی چین ءِ تر ءُ تاب ءَ کناں۔ اے تر ءُ تاب ءَ پاکستان ءُ چین ءِ نیام ءَ سیاسی ءُ اقتصادی یکوئی آنان دیمروئی دیگ ءِ گپ ءَ کناں۔ مزن وزیر عمران خان ءَ گوشت کہ کمیونسٹ پارٹی چائنا (سی پی سی) یک جتائیں ماڈل ات، مارا انوگ ءَ تاں اے گوشگ بوتگ کہ روبرکتی جمہوریت کجام ھم چاگرد ءِ دیمروئی ءَ گہتریں نظام انت بلے سی پی سی ءَ یک انچیں جتائیں نظام ءِ داتگ ایشی ءَ توامیں روبرکتی جمہوریت آناں ڈگار ءَ جتگ ۔ آئی ءَ گوشت کہ ما چین ءَ چہ کشت ءُ کشار ءِ شوبگ ءَ کمک ءِ واھشت ایگ آں۔ پاکستان بنیاتی رنگ ءَ یک کشت ءُ کشاری ملک ات ءُ ما وتی کشت ءُ کشاری پیداوار ءَ را ودینگ ءِ نیمگ ءَ دلگوش نہ داتگ۔ مارا امیت انت کہ ما چین ءَ را نوکیں زمانگ ءِ رد ءَ کشت ءُ کشاری بلدکاری ءَ چہ سیت چست کت کناں۔ آئی ءَ گوشت کہ صدر شی جن پنگ ءُ مزن وزیر لی کی چیانگ وتی بلدکاری ءِ وسیلگ ءَ اے ھند ءَ پج اتگ۔ ایشی ءِ واستہ آئی ءَ 30 سال ءِ جہد ءُ کوشست کتگ۔ آئی ءَ کوچگ ءِ تک ءَ جہد ءُ کوشست کتگ ءُ وتی ازمت ءَ چہ لیڈر ءَ جوڑ بوتگ۔ اے رنگیں کار بازیں گچین بوتگیں جمہوریت آنی تہ ءَ بیگواہ انت۔ چین ءُ آئی ءِ الس ءِ بابت ءَ پاکستانی آنی دل آنی تہ ءَ یک ھاسیں شرپ ءِ است انت۔ یک جستے ءِ پسو ءَ آئی ءَ گوشت کہ چین ءُ امریکا ءِ وت مہ وت ھلاپ بوھگ ءَ چہ کشاں چیل باز بیت۔ پاکستان پھم ایت کہ اے گپ راست نہ انت کہ امریکا ءُ ایندگر روبرکتی ھاٹیگ پاکستان وڑیں ملک آناں کجام ھم یک گروپے ءِ گوما ھمبراہ داری ءَ مجبور بکن انت، ما چیا کسے ءِ پلہ مرزی ءَ بکن آں۔ ما درستانی گوما جوانیں یکوئی ءِ لوٹوک آں۔ پاکستان چین ءِ گوما جوانیں یکوئی لوٹاں۔ پاکستان چین ءِ گوما وتی یکوئی آناں اچبر کم نہ کنت۔ ھرچی زور پر بہ بیت یکوئی مٹ نہ بنت۔ سی پیک ءَ چہ مئے اقتصادی آیوکیں بندات بندوک انت۔ مزن وزیر ءَ گوشت کہ چین یک جوانیں دیمروئی کنوکیں سپورٹنگ پاور ات۔ وھد ءِ ادارگ مھکم بنت گڈا اے ملک ءِ لیب ءُ گوازی ءَ را دیمروئی رس ایت۔ کورونا وائرس ءِ ھوپ ءِ بابت ءَ یک جستے ءِ پسو ءَ مزن وزیر عمران خان ءَ گوشت کہ دگنیا انوں زور پر انت ءُ ما اے ھاترا گڈی لیکہ ءِ درشان کت نہ کناں۔ مزن وزیر ءَ یک جستے ءِ پسو ءَ گوشت کہ سنکیانگ ءِ ھوالگ ءَ روبرکتی مٰڈیا ءُ حکومت ءِ بن گپ ءُ چین ءِ بن گپ ءِ تہ ءَ پرک انت۔ ما چین ءِ بن گپ ءَ را مناں۔ اے ھولگ ءَ روبرکتی میڈیا ءِ کشمیر ءَ را باز کم کوریج دیگ دو تل ءُ دو پوستی ات۔ آئی ءَ گوشت کہ سی پیک ءِ اولی فیز ھاٹیگ ءُ رابطہ بوتگ۔ نوں ما کشت ءُ کشاری شوبگ ءَ چین ءَ چہ سیت چست کنگ لوٹاں۔ ازمکار آنی ھوالگ ءَ کمک ءِ واھشت ایگ آں۔ یک جستے ءِ پسو ءَ مزن وزیر ءَ گوشت کہ چین ءُ امریکا ءِ ھلاپ کنگ نہ وشیں گپ ات ، ایشی ءَ چہ دگنیا یک رند ءِ پدا دو بھر آنی تہ ءَ بھر ءُ بانگ بیت۔ ما چیا کسے ءِ سائیڈ ءَ بگر آں، چین ءِ گوما مئے 70 سال کوھنیں یکوئی انت۔ اوگانستان ءِ ھوالگ ءَ یک جستے ءِ پسو ءَ مزن وزیر ءَ گوشت کہ سکیں گرانیں جست ات، اے وھد ءَ اچ کس ءِ کرا ایشی ءِ پسو نیست انت۔ امریکا ءِ درستاں چہ مستریں ردئی ایش انت کہ آئی ءَ اردی زوراکی ءَ گوں جیڈھ ءَ را گیوار کنگ ءِ کوشست کتگ۔ اوگانستان ءِ تاریخ انت کہ اچ کس اوگان آناں وتی دلے تب جوڑ کت نہ کناں، انچو کہ امریکا ءَ اوگانستا ءَ چہ در کپگ ءِ جار جتگ۔ طالبان آں ایشرا وتی باج برئی نامینت۔ اے وڑیں جاور ھال آنی رد ءَ سیاسی گیواری باز مشکل ءُ گران انت۔ اگاں اوگانستان ءَ خانہ جنگی بیت انت۔ ایشی ءَ چہ درستاں چہ گیش آماچ پاکستان بیت۔ ھمے ھاترا ھمک رنگیں سیاسی گیواری لوٹاں۔ مزن وزیر عمران خان ءِ چینی میڈیا ءَ گوں تران ءِ موہ ءَ بنجاھی وزیر اھوالکاری ءُ شنگ کاری چوہدری فواد حسین ءُ بنجاھی وزیر منصوبگ بندی، دیمروئی ءُ گہتری کار اسد عمر ھم ساڑی ات۔
