اسلام آباد۔ 30جون (اے پی پی) وزیرخارجہ شاہ محمود قریشی خبڑدار کرینے کہ اگہ قومی اسمبلی ٹی قائد ایوان ءِ ہیت کننگ کن ہلنگ پننگک تو قائد حزب اختلاف و بلاول بھٹو زرداری ئسک ہم ہیت کننگ کپسہ، ننے پارلیمانی ادب ہیل تروک آک پار کہ میثاق جمہوریت نا رداٹ سندھ اٹی اپوزیشن لیڈر ءِ پبلک اکاؤنٹس کمیٹی نا سرکڑدہ ئی ءِ انت اکن تفننگ انگ ءِ، قائمہ کمیٹی تیٹی اپوزیشن باسک آتے نمائندگی انت اکن تفننگ انگ ءِ۔ اوغانستان نا حالیت آتیا اینو پنچ شنبے نادے آ پارلیمانی سرکڑدہ غاتے بٹنگانن ہرافتے حوال تننگک۔ چارشنبے نادے آ قومی اسمبلی ٹی بلاول بھٹو زرداری، شاہدخاقان عباسی، اسعد محمود و خواجہ آصف نا اعتراضی ٹک انا ورندی ءِ ترسا وزیر خارجہ شاہ محمود قریشی پارے کہ داڑے دا ٹک ءِ ہرفنگاکہ دا بجٹ پاکستان نا الس نا ترجمان اف تو ورندی دادے کہ قوم انا 172نمائندہ تینا وونٹ اٹ بجٹ آ پت انا درشانی ءِ کریر۔ ایوان نا پیدوار گیشتری دانا مخ تفی ءِ کرے،خواجہ آصف وونٹ ءِ شرف ایتبو نا ہیت ءِ کرے تو نن داپانہ کہ وونٹ ءِ شرف تننگے ولے حکومتی بنچ آتیا تولوک مخلوق ہم الس نا وونٹ آتے اتسا بسنے اوفتا وونٹ آتا ہم بایدے شرف مرے۔ اوپارے کہ ہراتم حکومتی باسک آتا ہیت اٹ دخل اندازی مریک تو وونٹ ءِ اسہ کنڈی شرف مننگ کپک، داہڑتوم آ کنڈآتیامریک۔ اوپارے کہ ڈیہہ و اوغانستان نا حالیت آتیا خواجہ آصف نا ہیت آن اتفاق ءِ۔ داحالیت آتا رداٹ نن مچ آ اپوزیشن ءِ دفترخارجہ غا بٹنگان و اوفتا مون آ اوغانستان نا حالیت آتیا تینا موقف ءِ تخان۔ اوفک داڑآ تینا لیڈر آتے پت اٹ ہلنگ نا سلاہ تسر، داسہ داڑآ یکم جولائی آ سہ بجہ غا اپوزیشن نا پارلیمانی لیڈرآتے بٹنگانن اوفتا مون آ غٹ حالیت آتے تخنہ۔ اوپارے کہ بلاول بھٹو رولز انا حوالہ ءِ تس، ای حکومتی بنچ آتا کنڈآن برانز ریکارڈ کرفنگ خواوہ۔ اسپیکر ایوان نا کسٹوڈین ءِ اودے تنقید نا نشانہ کننگ پارلیمانی روایت آتا برخلاف ءِ اونا رولنگ نا برخلاف ہیت مننگ کیک اودے تضحیک نا شست کننگ کپنہ۔ اوپارے کہ دادے مون آ تخسا ملک انا مسکوہی وزیراعظم ہرالوز آتے پاہک انت اواونا شرف ءِ۔ داڑے پارلیمانی روایت آتا ہیت ءِ کننگا، بلاول بھٹو پائے سندھ اٹی قائد حزب اختلاف ءِ تران نا موقع تننگتو، داہراروایت آک ءُ، سندھ انا وزیر خزانہ بجٹ ءِ چٹفنگ آن بیدس ہنا۔ میثاق جمہوریت اٹ نوشتہ کننگا پی اے سی نا چیئرمین اپوزیشن لیڈرمریک، سندھ اٹی داوڑ کننگتو۔ سندھ اٹی قائمہ کمیٹی تیٹی اپوزیشن ءِ نمائندگی تننگتو۔ اوپارے کہ دابجٹ ءِ نم ہراکانود نا رداٹ چیلنج کننگ کیرے۔ اپوزیشن ءِ طے کروک وخت آن زیات تننگا وخت اس کہ سندھ اٹی اپوزیشن لیڈر ءِ ہیت کننگ کن ہلنگتو، داروایت آتا ہیت ءِ کیرہ۔
