اسلام آباد۔ 30جون (اے پی پی) چین پاکستان اقتصادی راہداری ڈٹ انا رداٹ صنعتی کمکاری نا دنگ اٹ رشکئی اکنامک زون ءِ ہڑتوم آ ملک آک بھلو اہمیت اس تسنو،شنگھائی کمکار تنظیم نا بشخ انا وڑاٹ رشکئی اقتصادی زون ءِ زیات تالان کننگ کن آن لائن کانفرس اڈتننگانے۔ کانفرنس آن تران کرسا انڈسٹریل پارک پروجیکٹ نا ڈائریکٹر آپریشن مس وانگ پاکستان اٹ زرکاری نا وارخواہی و انڈسٹریل پارک انا فائدہ غاتا بارواٹ پورو پریذنٹیشن تس۔ اوپارے کہ پاکستان اٹ کانڑ کنی، کشاری مصنوعات آتا پراسیسنگ، تعمیراتی و عمارتی گڑا، ٹیکسٹائل، کیمیائی مصنوعات، گاڈی، تمباکو، سل و ایلو بھلا صنعت آتے ٹی زرکاری نا بھلو وارخواہی اس ساڑی ءِ۔ دا ڈٹ 406.74ایکڑ رقبہ غا تالان ءِ ہرادے مسہ ریسہ غاتے ٹی بشخنگانے، داٹی جم وڑاٹ 128ملین امریکی ڈالر نا زرکاری مریک۔ اولیکو ریسہ ٹی 100ایکڑ ڈغار آ تفنگ نا وخت ءُ پاس 2سال ءِ۔ داتم اسکان 30درسد ڈغار تے سودا کننگانے۔ داتم اسکان ہڑتوم آ کنڈآتا فورلین اپروچ روڈ پورو مسنے و فورجی سگنل ٹاور نصب مسنے۔ پارٹی ورکنگ کمیٹی نا باسک و سکاڈانا مینجمنٹ کمیٹی نا ڈپٹی ڈائریکٹر ژیانگ ژیانگ پارے کہ شنگھائی کمکار تنظیمک چنگ ڈاؤٹی 361ڈٹ آتے ٹی 238ملین امریکی ڈالر نا درملکی زرکاری کرینو۔ چنگ ڈاؤایس سی او ملک آتے ٹی 2.01ارب ڈالر 155ڈٹ آتیا خڑچ کیک۔ اواومیت پاش کرے کہ پاکستان و سکاڈا نا نیام اٹ تین پہ تینی رابطہ غاتے پین سوگوی ملنگ کیک۔ داکانفرنس نا بست وبند ءِ سکاڈا، پاکستان چائنا سنٹر(پی سی سی) و سی آر بی سی اسیجائی وڑاٹ کریر ہراٹی چین و پاکستان نا نیام اٹ زرگزرانی، واپار و صنعتی شونداری و کمکاری ءِ مون آ دننگ و متحرک پلیٹ فارم کون آ باندات آ گپ وتران کننگا۔ پی سی سی نا ایگزیکٹو ڈائریکٹر وانگ زیہائی پارے کہ چین نا کاروباری ادارہ غاتے پاکستان اٹ پترینگ انگ کن اگست اٹ بھلو کچ اسے ٹی کانفرنس اڈتننگک۔
