اسلام آباد۔ 30جون (اے پی پی) چیئرمین سینیٹ محمد صادق سنجرانی پارینے کہ ہرملک انا الس نا است خواہی تا ترجمان و ملک انا شونداری و شونہالی و سلامتی نا بابت کانود سازی نا غٹ آن بھلا مقدم ادارہ پارلیمان مریک، پارلیمان نا شرف و تقدس ءِ مون تخنگ ننا غٹ انا بنداوی فرض ءِ۔ پارلیمان السی نمائندہ و قومی است خواہی تا ترجمان مریک ہراملکی و قومی فائدہ ٹی گچین فیصلہ کرسا ملک انا بقاء ءِ پک کیک۔ جہانی پارلیمان دے انا وخت آ تینا کلہو اٹی چیئرمین سینیٹ پارے کہ پارلیمان دے اقوام متحدہ نا کنڈآن ورناتے واکدار جوڑ کننگ نا سرحال آ 30جون آ مچ آ دنیا ٹی اڈتننگ انگ ءِ۔ محمد صادق سنجرانی پارے کہ پاکستان نا پارلیمان اٹی ہم اہم قومی باندات و الس ءِ مون تروک ویل آتا ایسری کن مثبت گام گیج چست کننگانے تانکہ الس ءِ حقی جمہوریت نا بھرم دوئی مننگ کے۔ اوپارے کہ اپوزیشن پارلیمان نا حسن مریک و پارلیمان نا چاگڑد ءِ سازگار تخنگ و ایلو پارلیمانی امور نا سرتننگ اٹ حکومت تون اوار اوار اپوزیشن نا کڑد ہم بھاز اہم تخک۔ اوپارے کہ جمہوری ادارہ غاتا سوگوی و ملکی سوگوی کن حکومت و اپوزیشن اسہ ایلو نا اختلاف آتے گیرام کرسا ملکی سالمیت کن تینا کڑد ءِ ادا کیر۔ چیئرمین سینیٹ پارلیمان دے نا بابت پارے کہ پاکستان نا پارلیمان دنیا نا اہم فورمز بشمول جہانی پارلیمانی یونین(آئی پی یو)، اسلامی ملک آتا تنظیم(او آئی سی)، سارک و ایلوفتا اسہ سرگرم و فعال باسک ءِ۔ اوپارے کہ ساڑی آ پارلیمنٹ ورناتے پین واکدار کننگ و اوفتے قومی دنگ اٹ اتنگ کن گچین گام گیج کننگ ءِ و ورناتے سیاست اٹ اوار کننگ نا بابت ہم ساڑی حکومت گام گیج ہلکونے۔ ہندا سوب ءِ کہ ساڑی آ پارلیمنٹ اٹ ورناپارلیمنٹ باسک آتا بھلو کچ اس ساڑی ءِ۔ خوش بختی نا ہیت ءِ کہ پاکستان نا آبادی 60درسد ورناتیاتالان ءِ ہراملک انا نہادی میرات ءِ۔
