اسلام آباد۔29جون (اے پی پی): مزن وزیر ءِ ھاسیں کمکار برائے وردن ءُ وراک ءِ رکھینگ جمشید اقبال چیمہ ءَ گوشت کہ استیں حکومت ءَ کشت ءُ کشاری شوبگ ءِ دیرموئی ءِ واستہ دھکان ، سبزکرائیبر ءُ کشت ءُ کشاری صنعتی شوبگ ءَ ھوار تومیں شریکدار آنی سیت ءِ رد ءَ آیوکیں باندات ءِ ھاترا گامگیج وتی کتگ، اے رد ءَ ایگریکلچر ٹرانسفارمیشن پلان نوکیں ٹیکنالوجی ءَ را کار مرد کنان ءَ کشت ءُ کشاری دیمروئی ءِ در جنگ ءُ درآمدی وردن ءُ وراکی سامان آنی ضلورت ءَ را کم کنان ءَ دھکان، سبزکرائیبر ءُ ھندی صنعت آنی رکھینگ کلیتی منصوبگ ات۔ اے منصوبگ ءِ چیر دستی ءَ کشت ءُ کشاری پیداوار ءِ کد ءُ بالاد ءِ تہ ءَ گیشی، فوڈ پروسیسنگ ءَ گیشی، معاشی دیمروئی ءِ وسیلگ ءَ دھکان آناں گتوم ءِ نوکیں نمونگ ءِ وسیلگ ءَ یک ایکڑ پیداوار ءِ تہ ءَ گیشی، پٹ ءُ پولی چست ءُ ایر آنی دیرموئی ایگریکلچر مالز آنی جوڑیشت، لائیو سٹاک ءِ شوبگ ءَ را نوکیں کار رپک ءِ رد ءَ کنگ ءُ وردن ءِ درآمد کنگ ءِ ضلورت آناں ھلاس کنگ ءِ رد ءَ ھاسیں دلگوشی کنگ بوھگ ءَ انت۔ کشت ءُ کشار ءِ شوبگ ءِ بجٹ ءَ را گوست ءَ 1.6 ارب کلدار ءِ بجٹ ءَ چہ گیش ودینان ءَ 62 ارب کلدار کنگ بوتگ، کشت ءُ کشار ءِ دیرموئی ءِ واستہ ملک ءِ ایندگر دمگ آنی گوما ھاسیں رنگ ءَ بلوچستان، خیبر پختونخوا ءَ ھوار بوھوکیں قبائلی دمگ، ڈیرہ اسماعیل خان، پوٹھوہار ءِ پڑ، ہزارہ ءِ دمگ ، گلگت بلتستان ءَ نوکیں جزم ءِ گوما کار کنگ ءِ واستہ گامگیج جوڑ کنگ بوتگ، آیوکیں لستیں سال آںی تہ ءَ وردن ءِ درآمدی ضلورت آناں ھلاس کنگ وھدیکہ شیر، بینگ ، فروٹ، سبزی ، ڈال ، زیتون، ٹرائوٹ ماھیگ، سویابین ءُ سپر فوڈ ءِ پیداوار ءِ تہ ءَ گیشی کنگ بیت۔ لائیو سٹاک ءِ شوبگ ءَ نوکیں زمانگ ءِ رد ءَ آرگ ءِ ھوالگ ءَ کار کنگ بوھگ ءَ انت۔ کشت ءُ کشار ءِ شوبگت ءَ پٹ ءُ پولی چست ءُ ایر آنی دیمروئی ءِ واستہ 10 ارب کلدار گیشینگ بوتگ، دھکان آنی آسراتی ءِ واستہ سرجمیں ملک ءَ ایگریکلچر مالز برجا کناں ایشانی واستہ حکومتی مالی کمک پجاری کنت، کوشست انت کہ 22 کروڑ ایکڑ زمین ءَ گیشاں چہ گیش دمگ ءَ را سر سبز ءُ شاتاپ جوڑ بکن آں۔ یک ایکڑ پیداوار ءِ تہ ءَ گیشی ءِ واستہ نوکٰں ٹیکنالوجی ءَ را دیمروئی دیگ ءَ آں۔ اے ھیالانی درشانی آئی ءَ سئے شمبے ءِ روچ ءَ “اے پی پی ” ءِ گوما ھاسیں انٹرویو ءِ ساھت ءَ کت۔ آئی ءَ گوشت کہ استیں حکومت ءِ سروکی ءَ گرگ ءَ چہ کشت ءُ کشار ءِ شوبگ ءِ دیمروئی ءُ گہتری ءِ سر ءَ ھاسیں دلگوشی دیگ بوھگ ءَ انت۔ آئی ءَ گوشت کہ ما ایندگر ملک آنی رد ءَ کم کیلریز ءِ کارمردی ءَ کناں، فروٹ ءُ گوشت ءِ کارمردی کم انت، مزن وزیر ءِ وژن انت کہ ما وتی آسراتی آناں اے رنگ ءَ کارمرد بکن آں کہ جوانیں وردن ءُ وراکی پجاری بہ بیت۔ آئی ءَ گوشت کہ حکومت ءَ کشت ءُ کشار ءِ توامیں شوبگ آنی سر ءَ دلگوشی کتگ۔ آلو ءِ پیداوار گیش ودینگ ءِ واستہ نادراھی ءَ چہ پاکیں توم آنی تہ ءَ گیشی کنان ءَ پیداوار ءِ تہ ءَ گیشی کنگ بیت، آلو ءِ ھمک سال پیداوار 5.7 ملین ٹن انت وھدیکہ لوٹ ءِ تہ ءَ ھمک سال 10 درسد گیشی بوھگ ءَ انت، گیش بوھوکیں لوٹ ءَ را پیلو کنگ ءِ واستہ آلو ٹشو کلچر ءَ را دیمروئی دیگ بوھگ ءَ انت۔ آءی ءَ گوشت کہ ملک ءِ توامیں بھر آنی تہ ءَ کشت ءُ کشار ءِ دیمروئی ءِ رد ءَ ھمگونگیں دلگوشی دیگ بوھگ ءَ انت، بلوچستان ءَ کشت ءُ کشاری شوبگ ءِ دیمروئی ءُ گہتری ءَ را گیش شاھیگان کنگ ءِ گنجاشک ءِ رد ءَ لائیو سٹاک، فروٹ ءُ سبزی ءَ ھوار ایندگر توم آنی پیداوار ءِ ودینگ ءِ واستہ گامگیج کنگ بوتگ، بلوچستان ءَ استیں حکومت ءَ سروکی ءَ آیگ ءَ پد 735 کسانیں کسانیں ءُ مزنیں ڈیم جوڑ کتگ۔ آئی ءَ گوشت کہ گلگت بلتستان ءَ لائیو سٹاک، فروٹ ءُ سبزی ءُ فشریز ءِ شوبگ ءَ را نوکیں لوٹ آنی رد ءَ ھمگام کنگ ءِ واستہ کار کنگ ءَ آں۔ آئی ءَ گوشت کہ جی بی ءِ آباتی 16 لکھ ءِ نزیک انت وھدیکہ دلوت 32 لکھ ءَ چہ گیش انت، اے دمگ ءَ فروٹ سبزی، میڈیس پلانٹس، سپرفوڈ ءِ پیداوار ءِ تہ ءَ گیشی ءِ بے کساس ازم است انت، حکومت پروسیسنگ ءُ پیداوار ءِ تہءَ گیشی ءِ واستہ ھندی آباتی ءِ گوما یکجائی ءَ جوانیں گامگیج آنی چیر دستی ءَ کار کنگ ءِ واستہ جزمیگ انت۔ آئی ءَ گوشت کہ مارگہ ہلز ءُ اسلام آباد ءِ ایندگر دمگ آنی تہ ءَ بینگ ءِ پیداور ءِ تہ ءَ گیشی ءِ واستہ کالونی جوڑ کناں، بینگ ءِ پیداوار ءِ تہ ءَ گیشی ءِ واستہ پی اے آر سی ءَ ھوار جتا جتائیں در بر جاھ آناں ھوار کنان ءَ زانت ءُ سرپدی ءُ مالوم داری پجاری کنگ بیت۔ آئی ءَ گوشت کہ درآمدی چیز آنی بڈو بوھگ ءَ را کم کنگ ءِ واستہ نعم البدل جوڑ کناں۔ آئی ءَ گوشت کہ صوبہ پنجاپ ءَ ٹوھیں کشار آنی پیداوار ءِ تہ ءَ گیشی ءِ واستہ سیم سر گیشینگ بوتگ انت، نوکٰں ٹیکنالوجی ءَ را دیمروئی دیان ءَ یک ایکڑ پیداوار ءَ را 1.5 ءَ چہ گیش ودینان ءَ 2.5 ءَ تاں ودینگ بیت، دھکان گندم ءَ چہ پد مونگے ڈال، مکئی ءِ رونگ ءِ واستہ زانت ءُ سرپدی پیداک کنگ ءِ ضلورت انت، گندم ءِ کشار ءَ را یک ماہے پیسر رونگ ءِ واستہ ھم دھکان آناں ھیل کاری دیگ بیت تانکہ کشار ءِ رون ءَ چہ پد دومی کشار ءَ را کشگ ءَ چہ گیشاں چہ گیش سیت در جت کُت بکن اَنت۔ آئی ءَ گوشت کہ ما شیر ءُ گندم ءِ پیداوار ءَ را سئے سرئی گیش ودینگ ءِ واستہ گامگیج آنی رد ءَ کار کنگ ءَ آں، مئے کرا 10 کروڑ پس، 4 کروڑ 90 لکھ گوک ءُ 10 کروڑ گامیش انت۔ دلوت آنی نسل آنی ردوم ءَ را گہتر جوڑ کنگ ءَ معاشی دیمروئی بیت ءُ گریبی ءُ نیزگاری ءِ تہ ءَ کمی کئیت۔ مزن وزیر ءِ وژن ءِ چیر دستی ءَ کشت ءُ کشاری ٹرانسفارمیشن پلان ءِ مول ءُ مراد کشت ءُ کشاری شوبگ ءَ را دیمروئی دیان ءَ گریبی ءِ تہ ءَ کمی آرگ، معاشی ءُ صنعتی برجائی، وردن ءُ وراک ءِ سستائیں دام آنی دستیابی ءُ دھکان آناں ھمک رنگیں آسراتی ءِ پجاری ءَ را دل یکیمی جوڑ کنگ انت۔ آئی ءَ گوشت کہ کپاس ءِ شوبگ سک باز ارزشتی انت ، بلوچستان، چولستان، تھر ءَ ھوار ایندگر دمگ آنی تہ ءَ کپاس ءِ پیداوار ءِ تہ ءَ گیشی ءِ وا ستہ گامگیج تیار کنگ بوتگ، حکومتی گامگیج آنی سبب ءَ آیوکیں سال ءَ ٹیکسٹائل ءِ شوبگ ءِ برآمدی چیز آناں 20 ارب ڈالر ءَ تاں ودینگ ءِ امیت ءُ اوست سہرا انت۔ آئی ءَ گوشت کہ کشت ءُ کشاری شوبگ ھمے واستہ ارزشتی انت ایشی ءَ چہ گیشتریں آباتی ءَ را روزگار ءَ گوں بندوک انت، اے شوبگ ءَ دیمروئی دیان ءَ نا ایوک ءَ وردن ءُ وراک ءَ چہ وتی لاپ ءِ واستہ کٹ ءُ کمائی گیش بوت کنت بلکینگ ءَ روزگار ءِ موہ ھم گیش وینگ بوت کن اَنت۔
