اسلام آباد۔ 29جون (اے پی پی) سی پیک نا ارٹ میکو ریسہ پاکستان اٹی روزگار اٹی ودکی و جی ڈی پی نا نموٹی اہم ءُ کڑد اس ادا کیک، پاک چین صنعتی کمکاری پاکستان ءِ ڈیہہ ٹی پیدواری ہند اس جوڑ کیک۔ صنعتی زون تا جوڑ کننگ آن ہندی صنعت کار آتیکن زرکاری نا بے شمار وارخواہی ودی مریک۔ زرکاری بورڈ کمامدارآک قومی خبررساں ادارہ ”اے پی پی“ ءِ پاریر کہ چینی صنعت آتا پاکستان آ گدریفنگ آن بے روزگاری نا چٹفنگ، چندی بشخ آتے ٹی معلومداری تا ہل و تس و مہارت اٹ ودکی مریک۔ کمامدارآتارداٹ سی پیک نا داسہ ارٹ میکو ریسہ بناکرینے داریسہ ٹی صنعتی کمکاری اٹ و کشت وکشار نا مون آ دننگ نا ڈٹ آتا سوب آن اولیکو ریسہ غان ہم زیات گیشتر و نمان اثر مرتب مریک۔ کمامدارآتار داٹ زند انا ہر بشخ وڑناوڑاسے ٹی سی پیک تون گنڈوک ءِ۔ ہنداخاطرآن اگہ پاننگے کہ ”سی پیک غٹ اکن“ تو داڈٹ انا وژن نا گچین عکاسی مننگ کیک۔ دااسہ خالص شونداری ڈٹ اسے ہرانئے بیرہ چین وپاکستان اسکان محدود ءِ بلکن مچ آ ڈیہہ کن شونداری و شونہالی نا ضامن ءِ۔ ہنداخاطرآن پاکستان و چین ہڑتوم آ ک سی پیک نا ڈٹ آتے وخت آ پورو کننگ نا عزم تخرہ۔ کمامدارآتارداٹ سی پیک نا رداٹ درملکی زرکارآتے زیات آن زیات آسراتی تننگک۔ فیصل آباد اٹی علامہ اقبال خصوصی اقتصادی زون و رشکئی خصوصی اقتصادی زون آ کاریم جوانی اٹ برجاءِ و بھلو کچ اسے ٹی زرکارآک دااقتصادی زون تے ٹی سرمایہ خلنگ اٹ است خواہی ظاہرکرینو۔ پاکستان چین پاکستان اقتصادی راہداری نا ارٹ میکو ریسہ ٹی صنعتی و کشاری شونداری و گچین سڑک رابطہ غاتا سوب فائدہ ہرفنگ نا بناءِ کیک۔ حکومتی سازگار پالیسی تا کمک اٹ زرکارآتے غٹ ممکنہ آسراتی فراوان مننگ ءِ، اسہ ڈیہہ اسہ شاہراہ ڈٹ ساڑی صدی نا تقدیر ءِ بدل کیک ہراٹی چین پاکستان اقتصادی راہداری اسہ اہم ءُ ڈٹ اسے۔ ہڑتوم آ ملک سی پیک نا اسیجائی کمکار کمیٹی نا دہ می دیوان نا تیاری ءِ کننگ ءُ۔ بروک آ ریسہ ٹی ہڑتوم آ ملک گوادر پورٹ ءِ شون تننگ، انڈسٹریل پارکس، کشت وکشار، سائنس و ٹیکنالوجی پین پین کن گام گیج آتیا چکار کیرہ۔ چین پاکستان ءِ انڈسٹریلائزیشن، اربنائزیشن، ڈیجیٹائزیشن و کشت وکشار نا ماڈرنائزیشن اٹ کمک کیک۔
