اسلا م آباد۔ 29جون (اے پی پی) پاک فضائیہ نا سروک ایئر چیف مارشل ظہیر احمد بابر سدھو ترکی نا 4دے ئی سرکاری دورہ ٹی سے شنبے نادے آ ترکی نا سینئر فوجی سرکڑدہ غاتون اوڑدہی کرے۔ ایئر چیف ترکی نا وزیر قومی دفاع ہولوسی ایکار و ترکی نا چیف آف جنرل اسٹاف جنرل یاسر گلرتون جتا جتا اوڑدہی کرے۔ اوڑدہی تے ٹی پاک ترک دفاعی تعلقداری ءِ پین مون آ دننگ و ہڑتوم آ فضائی فوج آتا نیام اٹ تین پہ تینی آزموندہ غاتیان فائدہ ہرفسا ہڑتوم آ کنڈآتا حربی کچ ءِ ودفنگ آ گپ وتران کننگا۔ پاک فضائیہ نا ترجمان نا رداٹ اوکان پد ایئر چیف مارشل ظہیر احمد بابر سدھو کمانڈر ترک ایئر فورس جنرل حسن کوکاکیز تون ہم اوڑدہی کرے۔ شرفمندآ سروک آک ہڑتوم آ ملک آتا فضائی فوج ءِ ساڑی آ دور انا مون تروک چیلنج آتون مون تننگ کن اسہ ایلو نا چاہنداری تیان فائدہ ہرفنگ و تین پہ تینی کمکاری ءِ مون آ دننگ آ سرجم گپ وتران کریر۔ اوڑدہی ٹی پی اے ایف و ترک فضائیہ نا نیام اٹ ہواباز آتا تربیت و تبادلہ غاہم گپ وتران مس۔ سروک پاک فضائیہ ایئر چیف مارشل ظہیر احمد بابر سدھو ءِ ہڑتوم آ فضائی فوج آتا نیام اٹ تین پہ تینی کمکاری و تعلقداری نا مون آ دننگ نا شاندار خذمت آتا اعتراف اٹ ترک آرمڈ فورسز نا لیجن آف میرٹ ایوارڈ ہم تننگا۔ کمانڈر ترک فضائیہ جنرل حسن کوکاکیز تمغہ اس پیش کرے۔
