اسلام آباد۔ 29جون (اے پی پی) چیئرمین نیب جسٹس جاوید اقبال دوبہ دار مسکوہی بنجائی وزیر اعجاز جاکھرانی نا وارنٹ دزگیری آ عملدرآمد و پٹنگ نا کارروائی ٹی 28جون آ مشتعل مچی نا کنڈآن نیب انا ٹیم آ بیدادی نا سخت نوٹس ءِ ہلکونے و ڈی جی نیب ءِ ہرپلوآن داواقعہ نا جاست وپاست نا پرمان کرینے۔ نیب اعلامیہ نا رداٹ نیب سپریم کورٹ آف پاکستان نا پرمان آ ضلع جیکب آباد سندھ اٹی سندھ ایجوکیشن ریفارمز پروگرام نا فنڈاٹی پاننگوک نغڑد نا بابت پرمان آ ایجوکیشن ورکس ڈیپارٹمنٹ جیکب آباد نا آفیسر وکارندہ غاتا برخلاف انویسٹی گیشن نا منظوری ءِ تس۔ انویسٹی گیشن اٹی مجاز کمامدارآک کانود نا رداٹ دوبہ دار مسکوہی بنجائی وزیر اعجاز جاکھرانی نا وارنٹ دزگیری ءِ جاری کریر۔ وارنٹ دزگیری آ عملدرآمد کن نیب سکھر نا ٹیم لیڈی پولیس کانسٹیبل آتون اوار 28جون آ شام انا شش بجہ ءُ 30منٹ آ ہندادوبہ دار نا اُراغا چھاپہ خلکر۔ پٹنگ اٹی دوبہ دار مسکوہی بنجائی وزیر اعجاز جاکھرانی نا اُرانا درگہ غا متشدد مچی اس ئسک۔ ہرانا سوب آن نیب انا ٹیم ءِ مزاحمت تون مون تروئی تما۔ اوفتا بیدادی آن نیب ٹیم ٹھپی مس۔ وخت اس کہ داکان بیدس ویگوجی پی اے 919، ہائی ایس ویگن و پولیس موبائل ءِ نسخان رسینگا۔ یات سلے کہ ڈسٹرکٹ پولیس سکھر جیکب آباد و ایس ایس پی جیکب آباد نیب انا درخواست آن پد ہم کانود نا رداٹ پٹنگ اٹ ہچ ءُ کمک اس فراوان کتور۔
