اسلام آباد۔ 28جون (اے پی پی) وزیراعظم عمران خان ناران دامان ءِ جہانی آب انا سیل و سواتی ہند اس جوڑ کننگ کن سیل و سواتی تا آسراتی و چاگڑد و جنگلی حیات نا رکھ اکن گام گیج آتا بناءِ کرے۔ وزیراعظم میڈیا آفس آن جاری بیان نا رداٹ وزیراعظم عمران خان دوشنبے نادے آناران دامان نا دورہ ءِ کرے۔ گورنر خیبرپختونخواشاہ فرمان، وزیراعلیٰ خیبرپختونخوا محمودخان، خصوصی کمکار موسمیاتی بدلی ملک امین اسلم، سینیٹرز اعظم خان سواتی و دوست محمد مشہود ئسک وزیراعظم ءِ بخیرکریر۔ وزیراعظم ”ریور بنک پروٹیکشن اینڈ ہیبیٹیٹ ریسٹوریشن پروگرام“نابناءِ کرے۔ ہرانارداٹ اینخو نا سال شجرکاری مہم اٹی وزیراعظم نا کلین اینڈ گرین پاکستان ویژن نا رداٹ بھلو کچ اسے ٹی دیودار و پائن نا نیال آتون اوار اوار بھلو درخت ہم خلنگا۔ پروگرام دریائی کنارہ غاتے گڈنگ آن بچفنگ، ڈیم تیٹی سلٹ ءِ پُرمننگ آن توننگ، ناران نا زیبائی ٹی ودکی کننگ و چاگڑد ءِ درست کننگ اٹ کمکارمریک۔ وزیراعظم داوخت آ کمیونٹی ریور رینجرزاٹی موٹرسائیکل بشخا۔ کمیونٹی ریور رینجرزدریائے کنہار و اونا جھیل و چُرآتا چاروکی ءِ کرسا غیرکانودی ماہی گیری نا توننگ ءِ پک کیرہ۔ مستی دریائے کنہار، سیف الملوک و دودی پطسار جھیل اٹی ٹراؤٹ و ایلووڑنا مچھی تا کچ ءِ ودفنگ کن ہروڑنا ماہی گیری آ اِراسال انا پورو پابندی خلنگانے۔ ہندانا ارٹ میکو ریسہ ٹی ناران ڈیسٹینیشن ٹراؤٹ ٹرافی فشنگ نا بناءِ کننگک ہرانا رداٹ ”کیچ اینڈ ریلیز“ نا حکمت عملی ءِ تینا کرسا ٹراؤٹ و ایلو جنگلی حیات آتا شکارءِ متعین مروک حدآن گدرینگ انگ کن ہلنگ پننگک۔ داکان بیدس دریائے کنہار اٹی 30ہزار بھوری ٹراؤٹ مچھی ہم یلہ کننگ انگ ءِ ہرادانا آبادی نا ودکی نا سوب مریک۔ وزیراعظم سیل و سواتی تیکن ایمرجنسی ریسپانس سروس نا بناءِ ہم کرے ہرا سیل و سواتی تے ہلہلہ ئی حالیت آتے ٹی کمک فراوان کیک۔ وزیراعظم داوخت آ سیل و سواتی ہند آتا سفائی ءِ برجاتخنگ کن مشینری ہم انتظامیہ نا حوالہ کرے ہراناران نا قدرتی زیبائی ءِ برجاتخنگ اٹ اہم کڑ د اداکیک۔ مستی پلاسٹک بیگ آتا سیل و سواتی ہند آتیاکاریم اٹ اتنگ نا حوصلہ شکنی کن وزیراعظم ہندی مخلوق اٹ ہڑدے ئی گڑاہلنگ کن بائیو دیگریڈایبل بیگ ہم بشخا۔
