اسلام آباد۔ 28جون (اے پی پی) وزیر مملکت حوالکاری و شینکاری فرخ حبیب پارینے کہ ننے آئین و کانود نا بالادستی نا سبخ تروک آ ک تینٹ بڑزکو عدلیہ نا فیصلہ غاتے منپسہ، ہراعدالت نواز شریف ءِ طبی بنداوتیا8ہفتہ نا ضمانت تس ہموعدالت اونا اپیل آتے مسترد و سزاتے بحال کرینے، نواز شریف ءِ پدی اتنگ نا گارنٹی ءِ پورو کپننگ آ شہباز شریف ءِ اپوزیشن لیڈر مننگ نا ہچ ءُ حق اس اف۔ اودوشنبے نادے آ سلاہکار پارلیمانی امور ڈاکٹر بابر اعوان تون اوار پی آئی ڈی ٹی پریس کانفرنس آن تران کریکہ۔ وزیر مملکت فرخ حبیب پارے کہ اسہ کنڈآ ننے کانودو آئین نا بالادستی نا سبخ ایترہ، ایلوکنڈآ او عدالت ہراطبی بنداوتیا 8ہفتہ غاتا ضمانت تس، اپیل آتا دائر مننگ آ نوازشریف نا سزاءِ معطل کرے، ہمو عدالت داسہ اپیل آتے خارج کرسا ایون فیلڈ، العزیزیہ ریفرنس اٹ سزاتے بحال کرینے۔ اوپارے کہ آئین و کانود نا حاکمیت نا سبخ تروک آتے ٹی تضاد ارے اوعدالتی فیصلہ غاتیا عمل کننگ آن پانادءُ۔ اوپارے کہ کیلبری فونٹ جعلی ٹرسٹ ڈیڈ و قطری چھٹی آن بیدس اوفتے تون ہچ اس اف، نواز شریف ہراماڑی تے ٹی زند ءِ تیر کننگ ءِ اوفتا ریکارڈ ہی اف۔ اوپارے کہ شہباز شریف، نواز شریف ءِ پدی اتنگ کن ضامن ئس و نن آ چپیکو گلی آن نرنگ نا کوشست کرینے۔ اوپارے کہ شہباز شریف ایوان اٹ گھنٹہ غاتا گھنٹہ سلسا پنت و شون و تینٹ میاں فضیحت ءِ۔ اوپارے کہ مریم صفدر پارے کہ نواز شریف بالکل دراخ جوڑ ءِ، اودے این آر اوایتر تو پدی بریک۔
