اسلام آباد۔ 28جون (اے پی پی) چیئرمین سینیٹ محمد صادق سنجرانی پارینے کہ احتسابی عمل نا نتیجہ ٹی پوریاگر و کاروباری تپہ نا زیزاریفنگ نا تاثرنا بایدے نفی مرے۔ سینیٹ سیکرٹریٹ نا رداٹ داخیال آتا درشانی ءِ او چیئرمین نیب جسٹس (ر) جاوید اقبال تون گپ وتران کرسا کرے ہرا دوشنبے نادے آ پارلیمنٹ ہاؤس اٹی اوڑتون اوڑدہی کرے۔ اوڑدہی ٹی چیئرمین نیب چیئرمین سینیٹ محمد صادق سنجرانی ءِ نیب انا سالانہ رپورٹ 2020ء ءِ پیش کرے۔ چیئرمین نیب بڑزکو ایوان نا سروک ءِ ملک اٹ برجااحتسابی عمل نا بابت سرجمی اٹ معلومدار کرے۔ احتسابی عمل ءِ زیات شفاف و گچین کننگ کن کروک آ گام گیج آتا بارواٹ حوال تس۔ چیئرمین سینیٹ پارے کہ احتساب نا عمل اٹ شفافیت و بے کنڈ ہلنگ ءِ ہرحال اٹ برقرار تخنگے۔ احتسابی عمل نا نتیجہ ٹی پوریاگر و کاروباری تپہ ءِ زیزاریفنگ نا تاثرنا بایدے نفی مرے۔ داوخت آ چیئرمین نیب پارے کہ کرپشن نا چٹفنگ آن پوریاگر و زرکارآتے گچین چاگڑد اس دُوبریک۔ پارلیمنٹ نا باسک آک و کاروباری تپہ نا کنڈآن مثبت سلاہ تا ستاءِ کینہ۔ اوپارے کہ احتسابی عمل آن کس اسے خوفزدہ مننگ نا گرج اف۔ ننا ایجنڈا بیرہ پاکستان نا شونداری و شونہالی کن سازگار چاگڑد اس فراوان کننگ ءِ۔
