اسلام آباد۔ 28جون (اے پی پی) بنجائی وزیر مواصلات و پوسٹل سروسز مراد سعید پارینے کہ دیکی روٹ نا ڈٹ آتے سی پیک اٹ اوار کننگ آ چین نا منت وار اُن، داڈٹ آتیان دیکی روٹ انا علاقہ غاتے ٹی شونداری نا پوسکن آ دور بناکیک۔ داخیال آتا درشانی ءِ بنجائی وزیر مراد سعید چین نا وزیر ٹرانسپورٹ لی زیاوپنگ تون ورچوئل دیوان اٹی کرے۔ لی ژیاوپنگ بنجائی وزیر مراد سعید ءِ چین اٹ مروک آ یواین گلوبل کانفرنس اٹ بشخ ہلنگ نا سلہ خلک و بیلٹ اینڈ روڈ انا رداٹ سی پیک اٹ وزارت مواصلات نا کڑد انا ستاءِ کرے۔ چینی وزیر ٹرانسپورٹ پارے کہ پاکستان اٹی سی پیک نا پورو و برجاڈٹ آتیان شونداری نا سفر آ بھاز خوشی مسنے۔ بنجائی وزیر مراد سعید دیکی روٹ انا ڈٹ آتے سی پیک اٹ اوار کننگ آ چین نا منت واری ءِ ہرفسا پارے داڈٹ آتیان داعلاقہ غاتے ٹی شونداری نا پوسکن آ دور بناکیک، مراد سعید فیٹف، کشمیر وایلواہم باندات آ چین نا کمکاری نا ہم منت واری ءِ ہرفے۔ بنجائی وزیر تینا چینی ہم منصب ءِ وزیراعظم عمران خان نا نیزگاری نا چٹفنگ، سیل و سوات نا مون آ دننگ و دیرپاشونداری کن عمران خان نا ویژن آہم ہیت کرے۔ چینی وزیر ٹرانسپورٹ وزیراعظم عمران خان نا ویژن نا ستاءِ کرسا نیزگاری نا چٹفنگ کن چین نا کمک نا باوری کرفے و چین نا جامع پلان نا بابت معلومدار کرے۔ اوپارے کہ چین و پاکستان سی پیک ءِ مون آ درسا دیکی روٹ اتون اوار ایم ایل ون، کشت وکشار، نیزگاری نا چٹفنگ و ایلو ڈٹ ٓتیا تین پہ تینی شریداری اٹ کاریم کننگ ءُ۔
